Nere nahigabea
Larrea, Pierre
1
Ez da nere nigarrez, nehor urrikaldu,
Nere gazte demboran, ama nuen galdu,
Jainko jaunari zaio, marraska hau heldu:
Zendako duzu bada, zure ganat bildu?
2
Ama baten galtzea, malhurrik hitsena;
Doa bethi handituz, orai nere pena,
Ez zaio soleiturik, onokuan jina,
Urrikaltzeko baita, kasu hortan dena...
3
Ama nere lohan zait, bizirik agertu,
Haren ikusteaz naiz, ichtant bat gozatu,
Bainan amets gochoa denean airatu,
Egia trichtea dut bethi han kausitu.
4
Asko denbora badu, nizela bakarrik,
Atseginen erdian goiz arrats trichterik.
Othoitz eta laneko gostua galdurik,
Ez baitaut nehork eman kontsolamendurik,
5
Nori ditut erranen orai nere penak?
Norek kontsalatuko nere bihotzminak?
Urus izan nizeno nintuen lagunak,
Malurus naizenian, dire joaiten denak.
6
Uste nuen nik ere segur ahanztea
Aski denborarekin gaitz horren kaltea...
Oi zer ustekeria! zer mundu trichtea!
Nola dut ahantziren ner ama maitea?
7
Mundu hitsa, neretzat ez duk atseginik,
Bizirik egoitea balio duenik;
Hortako hut utziren in gabe fazoinik...
Agian hil ondoan baduk zerbait onik!
8
Ethor hakiat laster, Heriotze hitsa!
Yauna, barka zadazu nere bizi hutsa!
Erregin zerukoa, har ner' azken hatsa,
Oi balitz onhetsia, nik egin ametsa!