Errexil zenari, othoi, zonbait bertsu!
Lapurtar batek
1
Urruñan eta Eskual-herrian trixtezia da hedatu.
Xoriak eta bertsolariak bet-betan zaizku mututu.
Udazkenera, gaitzak bildurik, lagun bat zalote galdu:
Errexil handi gozo onaren boza ederra ixildu!
2
Bai ixildu da hain maite zuten etxeko maiten artean;
Ixildu ere lagunendako harrobi-lantegietan;
Eta ixildu oroz gainetik koblakari bilkuretan.
Haren kanturik ez da entzuten nehun baizik zeruetan.
3
Haren famari ez othe zaizko altxaturen zonbait kopla,
Ez alegeraz, bainan bederen othoitza dariotela?...
Zoin hunkigarri, jausten delarik gau ilhunaren itzala,
Errexiñolek deitoratzean ixildu errexiñola!
4
Ea, Xalbador, eta zu, Mattin, noiz zirezten atzarriko?
Segur doluak hautsi bihotzak ez du gostu kantatzeko;
Bainan, bertsua doloreari bortxaz ekentzen bazako,
Ez da dudarik dela mihirat ederragorik jaliko!
5
Beha nola den neskatxa baten begitartea edertzen,
Nigarrek soa dirdira batez diotenean argitzen;
Berdin bertsua, bihotz-odolez zaikularik ihinztatzen
Baratzetako arrosa baino hobeki zaiku loratzen.
6
Entsea bada, bertsulariak, Errexilen gorestera!
Erraguzue zer jite zuen, zuzen eta alegera,
Etxe-nagusi zintzo-zintzoa eta fededun suharra,
Zoin maite zuen Eskual-herria eta zoin maite eskuara!