Larrañe
1
Eskualtzalen Biltzarraren dei bat entzün dit ametsetarik
Jakin beharrez dabila nunbait badenetz kobl'egilerik
Ene xokotik ihardesten dit nahiz ez nizan hetarik
Breset andana bat hel-araziz goguan adelatürik.
2
Amiagarri zer-nahi bada mündü eder zabalian
Itsason gañen, lürpian eta lürrin bezala zelian
Kreazaliak hedatü dütü hauntarzünak üngürian
Eledin egon gizonki baizik hekin gizona lürrian.
3
Itsasuaren barnatarzüna, bortien goratarzüna
Ibar, zelaien largotarzüna, ordokien hedamena
Señale dira zonbat den handi Jaunaren nausitarzüna
Hoien ororen althian zer da ürgüllü-jankin gizona.
4
Ene zortiak nai erabili paseün mündian gainti
Bazter ederrik ikusi bena gozatü desnantsü güti
Bihotza beitzait beti ürratzen hürrrüuntzian sor-leküti
Gogo hunez niz ahal ordüko ützüli juan bideti.
5
Sor-lekia dit Eskual-Herrian nunbait Zibero-gañian
Sortzetik hunat urte zonbeiteri karga hartü dit suñian
Enintzalakotz aberats sortü behar dit ari lanian
«Zaharrago eta beharrago» gaztian entzüten nian.
6
Ziberoko olhalte haitak Larrañeko bordin dira
Hanko alhagiak belhar haitüz aisa büzagi beitira
Han egin gaznak badu gisala gozo bat partikülarra
Bere pareko haurhide güti zaio jinen aintzinera.
7
Bortüz, oihanez, ürtzokaglaz Larrañe be'doia bazen
Aizo herrian bekhatxteriaz üngüraturik bizi zen
Süstengüz praube etsaiez aberats thipiltürik agitü zen.
Oro besteri eman onduan deüse gabe baratü zen.
8
Españalako, Iraty-rako bidez orai trenkatürik
Hanko mendi ta oihan ederrak phüzkatan dir'ezarririk
Haietan gainti arrotzak prunki thai gabe amiatürik
Goiti beheiti kurri dabiltza üken gabe athertzerik.
9
Iraty-ko oihan bazterrian Bagargitako bizkarrin
Herri berri bat sortzen ari da hala-nula Hegixurin
Kanpotiarren inganatzeko zer ez daite oithin egin
Bena Jaunaren hexan den lana ez otoi arren desegin.
10
Gizona izan ez den günetan ez da seküla gerlarik
Sosa gidari den lekietan ez da xütitzen bakerik
Kasü ez dadin sekülan afit bortü hoitan holakorik
Bakian bizi den atendesak ez tü ez beste beldürrik.
11
Bizi-manera berrien kuntre ez düt haxitüren herra
Errespetatzen balinbadie gure huntarzün zaharra
Bena entzüler diot oihüka ezin eztitüz sükarra
Aspaldi-danik lanian dela Larrañen ürka-bülhürra.
12
Breset hoietan ez dirateke denak ororen gostüko
Halarik ere eniz düdatzen egiaren erraiteko
Larrañek ez du arrotz beharrik uhurian bizitzeko
Jinkuak egin beitü Larrañe oso Larraindarrendako.
13
Ene erranek kolpatüz nurbait agitü bada minbera
Berantü gabe altxa dadila lür huntarik petik gora
Amikeñeki argizagilat phorruantxu lanthatzera
Edo bestelan Akamarrerat Phetisantzen bazkatzera.
14
Agur Larrañe, Larraintarreki, jente gozo afablia!
Zien pareko ükenik ere mündiak hunez doblia
Lür hunen izena lizateke «Batarzünaren etxia»
Ni orai ixil, tanpez ez dadin iratzar zien khexia.