Konseilua
1
Neskatcha, sinets nezazu, ordu bada oraino:
Hauta zazu gizongaia plantako bezain sano,
Beti argi, urhats fermu, amets-egile baino
Gogoa alegerago eta zentzudunago.
2
Izan chintcho guziekin, erain gabe lillura:
Ez utz hala ez denikan nehori sinestera.
Bainan zuhauren bihotza izan zazu gupira:
Sendimenduz josietan ez har zure senharra.
3
Jitez jostakin baitzira eta laket irria,
Kasu lagunak ez dezan goibel zure bizia;
Samur-beratza bazinu, jelos laite guzia,
Etchean goizetik arrats hedatuz tristezia.
4
Ez-deus batek zauri liro beharbada handizki
Gizon sendimendutsua, huts ttipiena saki.
Igurikatu musua eskastean, nork daki
Zoin dohakabe litaken - etsitzerat johaki?
5
Senhar bihotz-eriekin emaztek lana frango;
Bethi huts-egin beldurrez gero ta ikarago:
Mama gocho soberakin ala pereka mengo,
Gisa oroz jeloskorra ezin egona dago.
6
Laguna usaian baino amorosago bada,
Zer den ala tronperia, jaun tristeak barranda;
Emazteak lachoago izanez besarkada,
Horra berriz nagusia andreari mesfida.
7
Neskatcha, ez hauta beraz horrelako gizonik.
Ez zinuke zorionik, zurerik ez harenik.
Ez zinukete menturaz zuk ez harek hobenik;
Bainan zertako munduan sofri behar gaberik?