Lassalle jaun Kalonje zenari

J.P.

 1

 Begitartea argi ta kaskoa zuri,

 Begiak hauts kolore bi perla iduri,

 Zure sotana beltxa askitto bat tinki,

 Zonbat aldiz ez zaitut xut-xuta miretsi!

 2

 Naturalezarekin beti eskuz-esku,

 Jainko-nahia duzu ontsa konprenitu

 «Goiz-alderat behar da norapeit harrotu,

 Aratsa jin denean indarrak berritu!»

 3

 Kanpoan gau-ilhuna urratzen hastean,

 Xoriak ttiunttaka goizik airatzean,

 Jada jeikia zinen ohetik jauzian,

 Zure ohe xaharra utziz ilhunpean...

 4

 Berinak zabaldu-ta goxatuz freskura,

 Bazinauden ixtant bat errekari beha

 Azken ile xurier eztiki torraka,

 Zeruan zaudelarik izarrak keinuka.

 5

 Jainkoari emanez kartsuki bihotza,

 Zoin amultsu zinduken orduan otoitza!

 Zoin nasai, zoin jeneros goizeko eskaintza!

 Gauza hoik nola kanta, ai jakin baneza!

 6

 Gero meza sainduan zoin atsegingarri

 Zure musu eztiak aldare-gainari,

 Gogoa othoitzean osoki igeri,

 Juntatzen zinuela lurra zeruari.

 7

 Zerurako bidean lauzka hoberena,

 Othoitzaren aldean ez othe-zen lana?

 Othoitza, lurtiarrek egin oihu mina;

 Lana, Jainko-xedeen oiharzun ozena...

 8

 Nola ez aipa hemen zure errabia,

 Guri maitarazteko bertute garbia

 Eto horrekin beti edozoin egia?

 Kar horrek ez dautzuia iretsi bizia?

 9

 Gaixtakeri-bultetan, zure so bipila!

 Nola ez zuen joiten mutiko ergela!

 Azken hunek baitzuen, ai umil-umila,

 Zalukara itotzen bere dei tzarpila.

 10

 Kechu zinen alditan zure boz azkarra

 Bazabilan airean, -zer soinu idorra!

 Jausten zen tarrapatan burutik behera!

 Aitzakiak itzuliz aster zangoz gora...

 11

 Odola irakitan, zain hilak airean,

 Dena mehatxu gogor, hats guzia sutan,

 Larruko zimurdurak galdurik bet-betan...

 Zendako zinen bada jartzen molde hortan?

 12

 Zure bihotz zabalak moldatu gazteak

 Beti egonen dira kar beroz beteak:

 Odolean sarturik zuk erran elheak

 Ez ditu eremanen ixtant bat haizeak!

 13

 Zure barneko suaz gaitutzu berotu,

 Biharamuner buruz aide bat bultatu:

 Gure bihotz gaztetan barrastaka duzu

 Gutizia zuhurren hazia botatu!

 14

 Herioak gelditu gorputz zimel hura

 Goiz batez lerratu da kutxa batetara:

 Zure anima aldiz eskapi zerura

 Jaunaren Parabisu paregabekora.

 15

 Zure apez urhatsak handizki obratuz,

 Gure gogo-bihotzak gaizkitik beiratuz,

 Egun guziz gain hartan egoitza bat lantuz,

 Ez da dudarik ere han zaudela kantuz.