Maitasun tronpakorra
J.A.
1
Pertsu batzuek ateratzen tut gaur zuretzat Janpiarre
Zuhauk galdea in-ta ez jaliz berdin zintazke hasarre
Zuhaur zuzena izana gatik tronpatu izan baitzare
Sujeta zuzen agertuko dut, gertatu denaren pare.
2
Kalifornitik Euskal-Herrira berriz nago etorria
Ene gogoak bere ustean hemen batzaukan loria
Zazpi urteren buruan kusi dut maite naukan xoria
Eni hitzeman zerautan eta beste bati eroria.
3
Hats berapenka hasi zitzautan elgar kausitu orduko
Baitzakien ez zuela hitza enekin bururatuko
«Ez naiz fidela egon zuretzat, huna zer dutan lekuko:
Aingeruño bat sabel barnean, fitexko dena sortuko.»
4
Orroit zirea partitzean guk, eskuak tinko elgarri
Nola ohore eman ginduen amodio fidelari
Geroztik hunat izar faltsu bat gertatuz gure galgarri
Behin betikotz urrundu zaitu zure lehen zuzenari.
5
Zuhaur galdua ta eni berriz bihotza duzu kolpatu
Eritasun tzar hortarik nola behar naiz orai sendatu
Ameriketan nintzan denboran beti zuri dut pentsatu
Eta zuk aldiz bester fidatuz ederki nauzu tronpatu.
6
Tronpakor bati eman zirela, hau ezin sinetsizkua
Bertuterikan ez zinduena aski zure zaintzekua
Orroitzapena utzia dautzu hak bere odolekua
Harena baino nahiago dut segurki ene lekua.
7
Hola dabilan jende trixtea ez daike trankil nehola
Jainkoaz ere behar litake izan hanbatez axola
Nexka gaixoa galtzen duenak amodio hotzez hola
Nola salbatu beharko duke ukatuz bere odola.
8
Nitarik berex ezarri zaitu eta ber harek ez hartu
Amodioa argi zagona baitautzu ilun-nabartu
Zuhaurek nahi ala ez berdin bide faltsurat behartu
Fidelago bat bazinduela nola ez zira ohartu?
9
Egundainotik plazer guziek izan dute beren para
Erran dautazu afera hortan ez dela zure hobena
Bainan egiaz jakin zazue gis-hotan gertatu dena
Ez da bakarrik bera hobendun, haurra baitago biena.
10
Nahi ala ez bihotzetikan, Luixa, behar zaitut kendu
Debaldetan da orai zurekin egitea konplimendu
Bainan hargatik gertatu hutsaz-maiten dautzut barkamendu
Agian zeru-lurren Jainkoak idei bera ukanen du.
11
Pertsu berriak emanak dira galde egin dauztanari
Atseginean beharra zena, gaizki erori denari,
Hari gertatu kasua baita segur nigar-egingarri
Euskal-Herriak eskain dezola beste bat kontsolagarri.
