Bertan gazte lagun zenari
J.A.
1
Penarekin naiz hasten kantatzen bihotzean baitaukat min
Gazte laguna falta bainuen herrirat naizelarik jin
Eskual-Herritik joan orduko kasetaz ginuen jakin
Lasartar nere adixkidea hil zela trakturrarekin.
2
Nahigabeak beti lurrean bortizki baitu irauten
Nere begiez jaz ikusia itzalia dago aurten
Makina dorpe izigarriak jendea laster errausten
Bizi direnek ikas bezate nola ibili behauten.
3
Izenik ez dut aipatuko gaur: familia da penetan
Nihaurek ere parte hartzen dut etxekoen nigarretan
Malur haundia gertatu dena nehorek uste gabetan
Bere biziaz gabetu baita hogoi eta lau urtetan.
4
Nihauri ere utzi dautazu orroitzapen bat iluna
Zindutalakotz arras ezagun eta klasako laguna
Adin gordina, gorpuz ederra eta ona osasuna
Jeinkoak berak har dezauzula sortzean eman zautzuna.
5
Azken aldikotz gertatu ginen Garaziko merkatuan
Kafe-ttipia guziek deitzen duguneko ostatuan
Biak aizanik solasean gu fazoin deliberatuan
Ez nuen uste beharra zela laster Krixto gana juan.
6
Lurreko zure bizia izan baita hanbatez laburra
Nihauri ere sar-arazi daut bihotz barnean beldurra
Gaurko tresnekin ez da oraino nehoren lotsa malurra
Holakorikan balitz Jaunari galda har gaitzan zerura.
7
Ezin ahantziz baigaude orai partitze lotsagarria
Zutan ikusi dugu guzien destina izigarria
Bainan enetzat hori dagoke gauze deitoragarria
Hogoi eta lau urtetan hila gorputz espantagarria.
8
Ainixko oren badugu biek pasaturikan gozuan
Eskua ere hedatzen zuen hain behako amultsuan
Hori gogoan geldituko zaut lurreko bizi osuan
Agian berdin eginen dauku geroan parabisuan.