Erromantzeak
Juan de la Cruz, (San)
1
«In principio erat Verbum» ebanjelioaren arabera Hirutasun Santuaz erromantzea
Hasieran bazen Hitza
ta Jainkoagan bizi zen
harengan zorionaren
goren-gorenean baitzen.
Hitza bera Jainkoa zen,
hasiera deritzana.
Hasieratik bizi da,
hasiera gabe izana.
Hasiera bera izanik
hasiera gabekoa.
Hitzari Seme deritzo
hasieratik jaioa.
Betidanik sortu izan du
eta beti ari da sortzen.
Beti beretik emanez,
inoiz ere ez agortzen.
Beraz, Semearen aintzak
Aitagan du izatea;
ta Aitak Semeagan du
bere aintzaren betea.
Elkarrengan bizi dira
maiteminduen antzera
biltzaile den maitemina
biengan izanik bera,
batagan nahiz besteagan
joz berdintasun betera.
Hiru Pertsona, maite bat:
horra hor hiru denera.
Maite bera guztiengan,
maitaleak gauzatuak,
maitale eta maitea
biak batez osatuak;
bakoitzak beragan baitu
hirurek duten osoa
eta bakoitzak maite du
izaki hartan jasoa.
Izaki hau bakoitza da,
hark soilik bildurik zinez
korapilo harrigarri
adierazi ezinez.
Beraz, neurrigabea zen
maitasun-lokarri zena:
hiruk maitasun bakarra,
haien muina zeritzana;
maitasunak bil-bilduan
baitu goren bere izana.
2
Hiru Pertsonen elkartasuna
Bien jatorri zuen
maitasun neurrigabean
Aita Semeari mintzo
erarik goxoenean,
inork jaso ezineko
miragarrizko elean;
Semeak soilik gozatuz
beroni egin hitzean.
Baina ulergarri zenak
ez zioen hauxe baizik:
-Seme, ez dut nik neuk pozik
zure konpainian ezik;
eta zerbait laket bazait
zugan nuke maitatuko.
Zure irudiko dena
hura nik ere gogoko;
zure antzik ez duenak
ezer ez du enekiko.
Zugan soilik dut atsegin
ene bizi muin-muineko!
Ene argiaren argi,
zu ene jakituria,
biziki pozten ninduen
ene izate-iduria.
Neurez hornituko nuke,
Seme, zu maite zaituna
eta harengan jarriko
nuke gure maitasuna,
maite izan zuelako
hark ene maite kutuna.
3
Kreazioa
-Emazte maitale suhar,
Seme, nahi nizuke eman,
zure balioagatik
izan gaitzan gu beragan,
eta neure ogi bera
mahai berean duke jan,
nik Semearengan dudan
altxorra ezagut dezan,
eta zu ederretsirik
kontent liteke niregan.
-Eskertzen dizut nik, Aita,
-zion Semeak erantzun-;
emazte horri emango
diot neure argitasun,
argi bidez ikus dezan
ene Aitaren goitasun,
harengandik jaso baitut
neure barneko ondasun.
Neure baitan eratzanik
kiskal bedi zure sutan,
poz minez zure ontasuna
gorets dezan ordutan.
4
Jarraipena
-Hala biz -zioen Aitak-
zure maitasunagatik.
Ta sortu zuen mundua
esan zuen hitz hartatik,
maitearentzat jauregi
jakituriaz egina;
bi zatitan bereizia:
behealdea eta gaina.
Behealdekoak zituen
hamaikatxo ñabardura,
goikoak, berriz, berekin
harribitxizko apaindura,
emazteak jakin zezan
nor zen Senar maitatia,
goialdean jarri zuen
aingeruen jerarkia;
behean atonduz, ordea,
gizakientzat tokia,
bere moldez ez zelako
hura bezain egokia.
Izaki eta tokiak
hala bereizirik ere,
emaztearen gorputza
dira denak betiere;
Senar berak maite-suaz
bihurtuz emazte bere.
Goikoak Senarrarekin
bizi ziren poz-eztitan;
behekoak, berriz, fedezko
igurikatze bizitan,
goratuko zituela
esan baitzien egitan
eta maila narras hura
zuela altxa eraziko,
ez zuela inork ere
geroztik gutxietsiko;
gauza guztitan kideko
egingo baitzen haiekiko,
eta haiengan murgilduz
beraiekin zen biziko.
Jainkoa gizaki egin
eta gizakia Jainko,
etxekotasun handitan
ihardunez elkarrekiko;
mahaikidetasun gozoan
jan-edanean ariko,
menderen mendetan bertan
bizilekua jarriko,
elkarrekin bildu arte
soinu eztitan betiko.
Hura zelako, izan ere,
bere maitearen buru,
zintzoen atalak hari
lotzea zuen helburu,
maitearen gorputzaren
osagarri baititugu.
Beso artean jasorik
txit eztiki beragana,
harengan isuri zuen
bere maitasun dan-dana
eta batasun estuan
Aitarengana darama,
Jainkoarengan gozatuz
honek duen gozamena.
Beraz, Aita ta Semea
ta hauengandik datorrena
elkarren baitan direnez,
emaztea da hurrena
ahozabalik gozatuz
Jainko-bizitzaren barrena.
5
Jarraipena
Goitik adierazi zaien
hitzaren itxaropenak
arintzen zizkien lanen
unadura eta penak;
baina tristatzen zituen
Senarraganako minak
eta itxarote luzean,
hura gozatu ezinak.
Horregatik otoitz gartsuz,
antziz eta larriminez
arren egiten zioten
negar eta intzirinez
noizbait etor zekiela,
segidan lagun eginez.
Batzuk honela zioten:
«Garaikide gerta bekit!»
Hauek: «Igor zazu, Jauna,
igortzekoa jadanik!»
Haiek: «Ai, ikus bazintut
jaisten goiak urraturik,
ez nengoke, horraitio,
malko-iturri bihurturik!
¡Garasta goitik, hodeiak,
lurra egarriz baitago;
arantzatoki izan arren
lur idor hau lehenago,
orain erraiak irekiz
loratu bedi oparo!»
Beste batzuk honelatsu:
«Bai dohatsu garai hartan
bizi zena eta ikus
zezakeena berbertan;
bere eskuz ukitu ta
lagun izan edozertan,
eta gozatu ahal izan
haren misterioetan!»
6
Jarraipena
Arren bai arren eginez
luze joan zen denbora;
baina azken urteetan
garrak egin zuen gora.
Simeon zaharrak barnea
zuen esperantzaz gori,
Jaunari eskatzen zion
ikus zezala egun hori.
Eta Izpiritu Santuak
agureari erantzun
hitzematen ziola ta
arretaz zezala entzun:
hil orduko ikusiko
zuela jaisten bizia;
izango zuela Jainko
bera hartzeko grazia
eta bere besoetan
besarkatzeko zoria.
7
Gizakundearen jarraipena
Emaztea han bizi zen
zama gaitzaren menpean,
Moise-ren bidez eman zen
legearen uztarpean.
Eta hura askatzeko
garaia bazenez gero,
Aitak honela zioen
bihotzetik samurkiro:
-Ikus, Seme, zure emazte
zeure irudiko egina,
ongi zegokion hari
izatea zure dina;
haatik -zugan ez baitzen-
haragiz zen ezberdina.
Honetantxe datza, beraz,
maitasunaren betea:
maitalea maitearen
antz-antzeko egitea(n).
Kidetasunik gorenak
dakar plazerrik onena;
ezpaigabe emazteagan
haziz joango dena,
ikusiz haragiz ere
bere antzeko zarena.
Semeak erantzun zion:
Nik ez dut borondaterik
zurea baino besterik,
zure nahiaz bat izanik
nago ohorez beterik;
eta zuk esandakoa
egoki datorkit, Aita,
zure ontasuna honela
hobeki agertzen baita.
Zure indar, jakituria
lau haizetara atera;
herriz herri joango naiz
munduari esatera
eder, gozo eta haundi
zarela era batera.
Nire emaztearen bila
noranahi naiz ni joango
eta haren neke-minak
nik neuk ditut eramango;
eta hura bizi dadin
herioa dut jasango,
eta idoitik jareinez
zerorri dizut emango.
8
Jarraipena
Orduan hots egin zion
goiaingeru Gabirel-i
eta Maria zeritzan
birjinagana bidali.
Honen baietzari esker
burutu zen misterio;
Trinitateak Hitzari
haragi ematen dio;
hiruk egin zuten lana,
baten bidez, horraitio;
eta Hitza sortua zen
Maria zela medio.
Lehen Aita soilik zuenak
Ama ere badu jadanik;
ez, ordea, beste edonor
bezala sortu izanik;
baten erraien barnean
gorputz hartuz harengandik;
Jainko Seme-gizaseme
deitura du horregatik.
9
Jaiotza
Jaio behar zueneko
unea heldu zenez gero,
ezkonberritan irten zen
bere ezkonohetik txairo,
besoetan zekarrela
emaztea maitekiro.
Ama dohatsuak zuen
eratzan bertako askan.
Abere mantsoak ere
hantxe ondoan zeduzkan.
Gizakiak euren kantuz,
aingeruak doinu-saioz
bien ezteiak ospatzen
ari ziren bozkarioz.
Baina Jainkoak sehaskan
negar eta intziriak;
haiek ziren emazteak
zekartzan ezkontsariak.
Eta Ama harri eta zur
trukea ikusirikan:
Jainkoa negar-intziriz,
gizakia poz-eztitan,
berez bestela gertatzen
baitzen beti haien baitan.
|