Ene bizia

Izenik gabe (Elizalde, Jean?)

 1

 Ene herria zira Baigorri

 Eman dautazu bizian hazkurri

 Hor sortu hor hil nahi

 Maite zaitut, ez da harrigarri.

 2

 Bidea luze etxetik herrira

 Zoin dorpe eskol katiximara

 Gogora heldu iragan denbora

 Xuxendu behar gazte den arbola.

 3

 Igandea behar mezaz ohoratu

 Auzo lagunek elgar hartu

 Jo pilota irri ta kantu

 Orduko karra orai banu.

 4

 Bestaz espartin xuritan emanik

 Fandango airoski mutxikoak bihotzetik

 Ote da orai holako egunik

 Segur enetzat ez segurik.

 5

 Adin ederrean nintzen ezkondu

 Haurren haztean denbora lastertu

 Banazka dira denak airatu

 Bainan penak enekin gelditu.

 6

 Astezkenetan ginuen herrian merkatu

 Etxeko Jaunak plazara bildu

 Kabala baino geihago tratu

 Ostatu xokoan bazen espantu.

 7

 Ene bizian mundua berritu

 Haren oldarra ezin dut segitu

 Beharrak egin saminki oihu

 Nagusi bortitza hori dut kausitu.

 8

 Hirur-garren adinera naiz heldu

 Biziak enganurik enetzat ez du

 Xahartzea zer zen ez dut asmatu

 Ezin bertzean behar onhartu.

 9

 Biziaren hegalak espos lagun zu

 Goazen luzaz biak eskuz-esku

 Maitasunak adinik ez du

 Xahar egunak eztitzen ditu.

 10

 Helburua biziak behar du

 Zonbat tristea litaken ez balu.

 Fede ta amodio bihotzean banu

 Azkenean gizonak hori aski du.