Bozak izan ditugu

Irigarai Goizueta, Pablo Fermin (Larreko)

 1

 Bozak izan ditugu aurtengo martxoan

 Kantuz aipa ditazke iragan ondoan

 Luberriaga doha aintzinat ildoan

 Berritz kontseilari da kantonamenduan.

 2

 Presentatzen gintuzten nork beren gizonak

 Ezkerrak biga eta bertze bi eskuinak

 Azken hoiek zituzten harrauts haundienak

 Euskalduna ezin ken miriku kaskoinak.

 3

 Boza emaile batzu tripako minekin

 Kliant eta aixkide mirikuarekin

 Uste zuten bozak bil solas ederrekin

 Gizonak lan-ta obrak behar ditu egin.

 4

 Herrirat heldu zaizku nunbaitik gizonak

 Sosarekin, erosiz hemen ontasunak

 Buruzagi bozetan dire ausartenak

 Kargudunen jornalak baitirare onak.

 5

 Kontseilariak badu lana nun zer egin

 Zortzi herritan bide eta eskolekin

 Egiteko frango du herritan jendekin

 Bertzentzat oren galtzen maiz behar du jakin.

 6

 Horra herrian gure haur-ta gazteria

 Bainan bihar nun dugu hoien lantegia

 Lot gaiten altxatzerat zerbait industria

 Hundarra ez dadin huts gur-Euskal-Herria.