Gora Baigorri 1964
Iriarte, Felix (Berjinanto)
1
Hemeretzi ehun ta berrogoi ta seian
A zer pilotariak Baigorri herrian
Agirri nagusitu nahirik luzean
Opor eginik zonbait sartu da etxean.
2
Zahar gaztetan ziren Baigorrin aferak
Batzu baginituen ustez lehen klasak
Bertze pilotariak zahar errefusak
Eta zer da gertatu: hauientzat xapelak.
3
Hazpandarrekin zuten partida azkenik
Hok jinak baigorrirat milaka goizetik
Jakin nahi duenak jaun hoien berririk
Bazkariz galda bitza... gauzadun delarik.
4
Aroa ez zaukaten nahi bezain huna
Gure plaza hau ere "plaza hits iluna"
Hau baitzen gibelean ez paretaduna:
Makur hoiek guretzat alderdi frikuna.
5
Hamahiru ta zortzi zer nahirik dela
Aurtengoan segurik gure duk xapela
"Bainan jinen gituk bai Hazparne hortara
Kuraie haundirekin ordainaren bila".
6
Bertze hamabortzean kittara hazparnen
Hek hameka joko ta gu bostetan ginen
Hasiak ginen jada diruen kondatzen
Eta bertzeak aldiz bazkari manatzen.
7
Bainan zaharrer segi orduan zen pixtu
Alfarok: "aupa!" eta Errekaldek xixtu
Agirren bihurriek buruak xoratu
Berterretxek goxoan ta Peiok trenkatu.
8
Azken pertsua: Biba Baigorrirendako
Bainan zueri ere Jaunak erraiteko
Hartzaren larrurikan otoi ez saltzeko
Ez balinbaduzue hartzik larrutzeko.