Sunbillatik Bankara
Iriarte
1
Mila bederatzi ehun eta hamabigarren urtean
Sunbilla hortan sortua naiz ni Nafarroako partean
Nere paperek erraiten dote urriko hilabetean
Baxenabarren bizi naiz orai herri maitatu batean
2
Gazte denboran ezin bainuen nik eskolarikan hartu
Jakitatea zoin den balios bizian nuzu ohartu
Santa sekulan eskola bortan ez dut zangorikan sartu
Inorantzian beharko dut nik bizi naizeno xahartu
3
Gizona beti uros nahia sortu izan da mundura
Baŕnan sekulan ez da biziko berak nai duen gostura
Udaberriko lore ederrak erortzen dira negura
Gizonak ere hortan berean izanen du arrangura.
4
Sortzetik hunat nola izan den nere munduko bizia
Hasia naizen pertsu hauetan esplikatzen dut guzia
Aldude hortan etxe batean jende onekin hazia
Eta Jainkoak eman zerautan pertsuetako grazia
5
Hamabi urte bete orduko pertsu kantatzen hasia
Euskal-Herriko ohiduretan bihotza nuen josia
Gure aitason pertsu moldetan hartu nuen fantesia
Nahiz ez nuen eskoletako alkietan ikasia
6
Hamasei urte bete orduko kantatzen nuen plazetan
Libertimendu, herriko besta, bai eta kabalkadetan
Orduko lagun pertsulariak hantxe daude zeruetan
Ni ere noizbait pasatuko naiz hek Joan ziren bidetan
7
Baxenabarren memento huntan zazpi pertsulari gira
Erran behar dut nor giren ere, egon zaitezte begira
Plaza batean hasten badira xoragarriak baitira
Jainkoak berak igorri gaitu kantari Euskal-Herrira
8
Baxenabarren egin dezagun bertsularien erronda
Koplari multxo pollitagorik nehon ez ditaike konda
Mixel Xalbador paregabea, Laka xapelketan on da
Arrosagaray eta Alkate, Mendiburu ta Ezponda
9
Nahiz ez naizen urrun ibili Euskal-Herritik aparte
Pertsu hauietan noizbait hasi zen azkenean Iriarte
Ixilik egon banaiz ere ni aspaldian orain arte
Hemendik goiti hartu gogo dut pertsulariekin parte
10
Euskal-Herritik Jainko Jaunari otoitz beroak hel-araz
Gure mintzaira gal ez dadien atxik dezagun ahalaz
Nahiz badiren kantu ederrak frantsezez eta erdaraz
Euskal-Herriko jende maiteak, kanta dezagun euskaraz
