Nork hil du Larralde?
Iriart, Pierre
1
Pertsu bere kantatzen orai naiz abian
Hasi nahia nintzen gan den aspaldian
Orai arte egon naiz begira lorian
Gaixtaginak hartuko zuztela agian
2
Otoi eman zazue zertaz diren kasu
Gauzak nahi nituzke xuxen esplikatu
Artzain bat bere bordan baitute garbitu
Etsaiaren indarra han da baliatu
3
Artzain hri bizi zen bakartasunean
Nehor bilatu gabe trankilitatean
Bere artalde eta behien artean
Xoilki bizitzeak du galdu azkenean
4
Mixel zuen izena deitura Larralde
Bakarrik bizi zena lagunikan gabe
Jan edan onik gabe zabilan debalde
Gauaz eta egunaz beti larrez larre
5
Gau hartan auzoan zen gaztain erre jaten
Tristeak holakorik ez zuen pentsatzen
Gaztain erreak janik artalderat gan zen
Kriminelak etxean harmaturik zauden.
6
Artaldea bildurik etxer'etorria
Egintxe zuelarik bere afaria
Deskantsuan lo zagon kadiran jarria
Bainan hurbil bazagon norbait atzarria
7
Zango puntetan zaizkon etorri bipilik
Haizkorak eskuetan ixil gibeletik
Hiru kolpez segidan buru arraildurik
Lurrean utzi dute bizia kendurik
8
Hiltzea ez zen aski nahi zuten erre
Lastoz eta petrolaz entseiatu dire
Ez zuten nahi utzi trazarikan ere
Afera ongi zuten baliatu balire
9
Justizia izan da jina Baionatik
Jandarmeria eta jaun mera herritik
Gibelerat itzuli bihotza tristerik
Ez baitute hatzeman nehor hiltzaileek
10
Nor nahi izan dadin horren egilea
Galdu du sekulakotz trankilitatea
Ez da libro bizia eskuez kentzea
Ez eta bertzerenaz hola jabetzea
11
Senperen gertatzeko zer gauza tristea
Horrek ekartzen baitu betiko kaltea
Sortuz geroz zor dugu guziek hiltzea
Bainan zoin lazgarri den holako hiltzea