Sort-etxeari
Aire, Ferdinand
1
Oi gure etxe maitea,
Orroitzapenez betea,
Zorionaren atea.
Zure altzoan iragana dut
Sortzetik orai artea.
Izanagatik pobrea,
Bertzeak baino hobea,
Ni sortu nintzan etxea.
2
Amak munduratekoan,
Etxea,zure xokoan
Hartu ninduen besoan.
Geroztik hunat eduki nauzu
Zure geriza goxoan,
Nabilalarik kanpoan,
Ez naiz sosegu osoan,
Beti etxea gogoan.
3
Dudalarik zerbait pena
Zu zaitut lagun lehena,
Iges leku hoberena.
Zure alderat inguratzen naiz
Ahalik eta maizena.
Munduko leku maitena
Zuri zor dautzut naizena:
Izana eta izena.
4
Arbason eskutik jina,
O egoitza atsegina,
Ez dakit zure adina.
Heiek lurpean estali ziren
Zutan utzirik arima
Hain amultsuki egina.
Heientzat zer bihotz-mina,
Zutaz gabetzen bagina.
5
Etxetik hoinberze gante
Kanporat zorion eske
Zoraturik bazoazte.
Bizi moduak behartuz edo
Etxea ez aski maite?
Gure faltaz balezate
Arrotzek etxea bete
Hobendun haundi gintaizke.
6
Zutaz hainbertze entzuna
Aunitzentzat ezaguna
O bizipide urruna.
Nik betidanik arbuiatu dut
Zure aberastasuna.
Hau da guk deraukaguna:
Zu baitan eskas duzuna
Etxeko goxotasuna.
7
Ene haur onak badakit
Luzaro gabe engoitik
Joanen naizela mundutik.
Arbason ganik ukan dohaina
Ez utz sekula eskutik,
Ald'egitean hemendik
Heier erraitea gatik:
Etxea han dago xutik.
8
Pertsu hauk bururatzean,
Azken finez orroitzean,
Emanen naiz otoitzean:
Etxea noizbait utziko zaitut
Aunitz pena bihotzean;
Jaunak, zure babesean,
Nola bainintzan sortzean,
Naukala heriotzean.
|