Pilota jokoa
Aire, Ferdinand
1
Nola Eskual Herriko bertze mutikoak
tirriatu izan nau pilota jokoak.
Ahalak ez ordea, nik hortarakoak.
Bertze zerbaitetako nindaukan Jainkoak.
2
«Pilota»-ko jeinuak eskastu bazauzkit.
Bihotza ta begiak Jaunak eman dauzkit.
Eskualduna delakotz, edo nik ez dakit,
etzaut bertze joko bat hori bezain pollit.
3
Kirola hau jokatzen da maiz egun argiz,
oneski beztiturik, errespetu haundiz.
Arrotzak dabilzkio berendako nahiz.
Paregabea baita ederrez ta garbiz.
4
«Pilota», zure bidez orok eskualdunak
bagarelako famak dituzte entzunak.
Zuk eginak gaituzu denen ezagunak.
Asko zor dautzu zuri gure nortasunak.
5
Zabaldu bazaituzte hemendik mundura
muga gabea bada, zure hedadura.
Eskerrak! ez daikela erraiten mentura
zu etzarela gure iturriko ura.
6
Joko huntan leu molde dezazkegu ikus;
esku-larruz, xixteraz, palaz edo eskuz.
Iduriz bereziak, jokatzeko moduz.
Bainan denak arima ber-beraren gorputz.
7
Beha pilota bati, jo ta jo bi talde,
denak beren nortasun osoaren jabe.
Gorputzaren nekeaz arduratu gabe,
«Pilota» daukatela otoitzaren pare.
8
Plaza ixilik dago, iduri eliza.
Beharien begiak pilotak dabiltza.
Jainkoak hango deiak baiezta balitza
talderik ahulenak luke azken hitza.
9
Neska gaztea ere bar dago behari,
pilota bers bezain bihotza jauzlari;
esku-zarten artetik otoizka jaunari
garraitza eman dezon haren maiteari.
10
Nork daki zonbat gogo han ote dabiltzan
gure pilotarien so baten peskizan?
Mutil dohatu hoiek hartzen diren gisan
nork ez luke nahiko pilotari izan?
11
Bainan zer da boza hau? Zer entzuten dut nik?
Deiadar bat bezala heldu urrundanik,
gure gazteriari «Pilotai» erranik:
ez nezazula berex eskuararen ganik.
12
Kirola ta hizkuntza, horra hor bi gauza
luza dezaketenak herriaren hatsa,
baldin ez bazerauku erdalduntzen plaza,
salbaturen garela badut esperantza.
13
Gauza ezaguna da bizian iraupen
kirolak herri bati diola emaiten.
«Pilota» maiteari leial egon gaiten,
hark lagunt gaitzan gero eskualdun irauten.
