Barkoxe
Idiart, Roger
1
Agur, agur, jente hunak, jin zide saldo handian
Besta beita Barkoxeko pelota plaza berrian
Koblakari izan banintz ariko nintzan gustian
Ahal dena eginen dut ene papera eskian.
2
Nurk erran du Xiberua hiltzeko phüntian zela
Egün heben ez ditake erran heiñ hortan girela
Plaza berri hau nahi düt eman etsenplü bezala
Eztü ez, hullanik ere, Barkoxek jo peko zola.
3
Agurtzen zütüt, Barkoxe, herri zinez üskaldüna
Eztüzü Etxahun deitzen koblakan ari zaizüna
Bena egün ene gisa hau da erran gei düdana
Ez ahatz guretzat dela Bazkoz Aberri-egüna.
4
Eskual-Herrian izan da koblakari txar eta hun
Lan hortan ezpaniz trebe, ezar nezazie kanpun
Koblakan ausartatürik aphez «manex» bat Xiberun
Kasü eztenez jauziren bere tunbatik Etxahun!
5
Khantari saldo ederra biltzen ari zaikü hortxe
Ahua freskatü ondun beitira hunat heltüxe
Gaztiak mintza zitaie üskaz bethi haboroxe
«Etxahun» izenareki khanta zazie Barkoxe.
6
Letera bat ükhen beitüt nustenin hego aldetik
Etzen ez Franco zaharrak igorria Kastillatik
Uskaldün elibat zaizkit galthoz ari Nabarratik
Berhala igor ditzadan zunbait berri Xiberutik.
7
Eta nik ordin holaxe deiet eman arraposti
Hoi izkibatuz ezpeitüt bate gezürra pentsati
Aurten Xibero xokuan huna zer zaikün agitü:
Berriz ere pastualka Barkoxtarrak abiatü.
8
Etxahunen ixtoria hanitxek die ikhusi,
Barkoxtarrek muntatürik segür ezpeitzen itsusi.
Aktürrek beren bersetak aisa dütie ikhasi
Haiñ untsa direnaz gaiñen pastualka berriz hasi.
9
Untsa begira zazie lüzaz kostuma eder hoi
Hortako gizon kapablez Barkoxek badü bere doi
Behar-e hor beitüzie errejent Germain Lexardoi
Eta khantari haitia: berritan züjet Lohidoi.
10
Soberaxe khantatü dit: adixkidik, othoi pharka
Aphezaren phedikia lüze denin ezin ükha
Plaza huntan ene gisa iauntsi beitüt koblaka
Orai hor, putiko gaztik, jokha zite pelotaka.
11
Jente hunak ordü beita etxerat abiatzeko
Beste bi kobla emanik hortan zütiet ütziko
Zunbaitek etxen badie lan paketa egiteko
Nik aldiz eztüt presarik ene ardien jeixteko!
12
Partida ürhentü beita khümit gira elkitzera
Gustin aide freskareki beste zerbaiten hartzera
Ni ja banua kanpula üngü baten egitera
Eta zien osagarrin bi godaleten hüstera!