Ipurdian

 1

 Bada mende bat beterik,

 Euskaldunak, Espainian,

 Sartu zirela gogotik

 Don Carlos-en dako gerlan,

 Behar zutela segurik

 Lege zaharra herrian...

 Zernahi gizon galdurik,

 Bazter ederrenak suan,

 Zer bildu zuten geroztik?

 Ostiko bat ipurdian!...

 2

 Mende laurden bat jadanik

 Iragan da, Nafarroan,

 Gazteria harmaturik

 Jin zela Franco-rekilan,

 Hunek aldiz hitz emanik

 Herrikoak ixtantian,

 Biziko zirela kasik

 Lehengo libertatian...

 Zer ukan dute bakarrik?

 Ostiko bat ipurdian!...

 3

 Muga horren bestaldetik,

 Berdin gira gu Frantzian:

 Gerletan leher eginik,

 Petzero gure lurrian...

 Xingolez saristaturik,

 Zaharrak dira lorian,

 Ta gaztiak, etsiturik,

 Ehunka Ameriketan,

 Jaun haundi batez ukanik

 Ostiko bat ipurdian!...

 4

 Buruzagi holakorik,

 Zendako gare gainian?

 Manex, ezkontzen delarik,

 Ez dea nausi etxian?

 Oi lagunak, beraz atxik

 Menditarrak mendietan!

 Eta herri-saltzalerik

 Agertzen bada bozketan,

 Har beza, doala hortik,

 Ostiko bat ipurdian!...

 IGORTZE

 Printzeak, aspaldidanik,

 Bizi dira ohoretan,

 Madriletik, Parisetik,

 Manatuz bere nahian.

 Eskualdunak lehenik

 Izan giten Euzkadian,

 Jaun horiek agurturik

 Ostiko bat ipurdian!...