Nausia, mutila eta erbia
Ainciburu, Ellande (Allande Aincibure)
1
Behin mutilarekin nausi bat ari zen
Larre zabal batean iratze pikatzen.
Toki hura erbiez famatua baitzen,
Han ihiztari zonbeit egun hartan bazen.
2
Bet-betan tiro batzu hor dire aditu.
Gare gizonek ere buruak goititu.
Erbi bat heier buruz herrestan zen heldu.
Gaixoak berehala indarra du galdu.
3
Nausiak laster batez erbia harturik,
Ezpal baten pean du ezartzen gorderik,
Irri gozo batekin erten duelarik;
«Erbikiz aseko nuk, mutil... ni segurik!»
4
Mutilak bere baithan, hitz hoik entzun-eta,
Zioen: «Jasta ere enetzat ez duka?
Ai, merezi huke, to, gantz handi gormanta,
Jabeak jin balite eta gai baheza!»
5
Hain sarri bi jaun ziren hetarat ethorri,
Galdez heian erbi bat zutenetz ikusi.
Ezetz zeien nausiak murritz ihardetsi,
Eta bere lanari lotu zen zorrozki.
6
Mutilak aldiz keinu ezpalen aldera,
Salatzeko bezala han zerbait bazela.
Jaun heiek hatzemanik erbia horrela,
Jotzen dute nausia lihoa bezala.
7
Pasoz hantu gizona nigarrez utzirik,
Ihiztariak urrun bazoatzilarik,
Mutilak erten dio irriz dagolarik:
«Nausia, hartu tutzu zanpak, zuk segurik!»
8
Egintza hunk dauku ongi erakusten
Nola garen lur huntan elgarrez behartzen.
Zorionean bertzez ez denak orhoitzen
Zorigaitzean lagun guti du izaiten.