Bakotxak beretik
Huarte, J.
1
Labeguerie, Inchauspe, Etchaluz, Etchandy,
Komunixta bestalde, boz-biltzale handi!
Bostak hauta gintio, zilegi baledi:
Denek fama badute eskualdean gaindi...
2
Orok izana gatik jeinu eta oldar,
Ez da bakar bat baizik izendatu behar.
Lauek bosten artetik ez dukete bihar
Deputatu ganbaran ipurdia nun jar!
3
Etchandy errienta besta muntatzeko
Parerik ez duela dugu aitortuko.
Ganbaran besta guti, eskolier gutixko,
Dugan atxik Etchandy gauhauren arteko.
4
Etchaluz anderea, andere xarmanta,
Irri pollit batekin ibilki boz-keta.
Haatik, hain gazterik, Pariserat-eta,
Lorea hits baledi, handi laike falta!
5
Komunixten gizona ez dut ezagutzen,
Nahiz bere lagunek duten estimatzen.
Esperantzarik gabe baita presentatzen,
Bozik ez ukaitea ez zaio gaitzitzen.
6
Inchauspe Garaziko dugu kontseilari.
Bai, segi dakiola kargu eder horri.
Ez balitz deputatu hoberik ageri,
Gogotik ginezoke boza eman hari!
7
Bainan deputatu bat, talenduz lehena,
Badugu hautaturik, Labeguerie jauna.
Bost urtez jarraituki egin dauku lana.
Zertako utz debalde hain langile ona?
8
Labeguerie izan da bi urthe aprendiz.
Deputatu-ganbaran ikasi du hainitz.
Ofiziale oso egin zauku ariz.
Aprendiz beharretan ez gaude iduriz!
9
Beraz, mediku jauna, zaude gure gizon,
Orai arte bezala egiguzu lan on!
Labeguerie jaunari diogu zorion,
Haren baliokorik guti baita nehon.