Beatak
Heuty-Ithurria-Guilbeau
1
Kantatzerat noha ni omore onian,
Suieta kausiturik Azkainko herrian.
Nahi dautzuet erran hemen konpainian,
Zer liliak ditugun beaten artian.
2
Elizan kantatzen da: «beatam me dicent!»
Holako egiarik nik ez dut aditzen:
Orai hastera noha ni horren frogatzen,
Bertsotan naizelarik beatez mintzatzen.
3
Beatez mintzatzian errazu non nahi:
Dotzena bat beata, medisent hamabi...
Zenbaitez choilki hemen naiz mintzatu nahi:
Heiek izanen dire guzientzat bahi.
4
Elizatik ez urrun dire lau presuna,
Atabala karrikan jotzen dakitena.
Tatchatto bat badute orok dakitena:
Mihia luze, sarkor, iduri eztena!
5
Hola nola erlea, kofoin bazterretan,
Lorez-lore dabilan egun ederretan,
Hala gure beatak dabiltza etchetan
Nundik zer berri eros, saltzeko bertzetan.
6
Oraino aditua erraten balute!
Bainan joste-brodatzen ederki dakite.
Berga bat eros eta biga saltzen dute,
Ofizioa ongi ikasi baitute.
7
Ibiltzen dire bada usu kofesatzen.
Zer othe dute hantchet chilorat botatzen?
Erdiak erran eta, bertzeak gordatzen:
Medisentzia ez da etsaminan sartzen.
8
Igande-astelegun elgarrekin dire.
Lan eginaren arras adichkide dire.
Trufan eta musikan bertzez ari dire.
Ezpalute bezala tatcharik batere.
9
Aintzinetik pereka, gibeletik jorra,
Da egun bakotcheko heien lan bakarra,
Imitatuz ederki animale tzarra,
Zeinak baitu eskuaraz izena: zakurra.
10
Adinak ez diote zentzua ttipitu:
Ez dute egundaino untza bat izatu.
Beharko dute naski mutchurdin gelditu,
Ez hartzekotzat zenbait kabeza churitu.
11
Bizpahiru badire ezagut-errechak,
Denborak baitiozte erran bere tatchak:
Batek larrua chimur, bertzeak hortz motchak:
Berrogoi urte segur baituzte bakotchak.
12
Guziek balukete ezkont-gutizia,
Norbaitek nahi balu andre hitzuntzia.
Inkanta dadiela botiga guzia,
Azkainen ez dadin gal beaten hazia.