Orhi-ko xoria
Harozteguy, G.
1
Orhiko, xoria Orhin bakean da bizitzen.
Bere larre-sasietan ez da hura unhatzen.
Han zen sortu, han handitu, han ari zen maitatzen;
Han bere umen artean goxoki du kantatzen.
2
Urusa harek bezala egiten dakiena!
Orhin sortu eta Orhin gazte zahartzen dena!
Aditzez baizik ez daki zer den kanpoko ona;
Bainan aldiz jastatzen du etxeko zoriona.
3
Bego etxeko xokoa oraino norberari!
Bego aitamen etxola haurrik hazienari!
Etxea beti etxe da, zenbat den itsusgarri;
Kanpoa beti kanpo da, zenbat den edergarri.
4
Etxean pena guziak dirade kontsolatzen;
Etxean zauri minenak nolazbait ere hesten.
Irriak, solas gozoak, non dirade han baizen
Gau-aldera familia denean bateratzen?
5
Familiako bizia, zein zaren plazertsua!
Zutaz gabetua dena, zertaz da jabetua?
Umezurtzen iduriko dabila herratua
Ezin bere bihotzaren aurkituz sosegua!
6
Zenbat urrikari dutan bizi dena kanpoan!
Bera da beretzateko mundu huntan osoan!
Jendez da setiatua, eta da desertuan!
Laguntza onik ez duke bere behar-orduan.
7
Etxeko txarra hobe da ezez-ez atze ona;
Atzeak ez du balio etxekorik txarrena:
Hori da alde orotan kurri doan errana;
Bainan ongi aditzeko frogatu behar dena.
8
Nik segurik zinez dakit nolako den kanpoa;
Itxura hainitz du eta funts hainitz txarrekoa.
Etzaitela hari fida: leguna du mintzoa,
Bainan gero sartzen dautzu ezten pozoatua.
9
Beraz gutarik bakotxa etxean egon dadin!
Orhin sortu balinbada egon dadila Orhin!
Zertako hainbertze urhats zorionketa egin?
Etxean du zoriona nork berak berarekin.