Biziaz gogoetan
G.L.
1
Lurreko bizi ezin aditu huntaz gogoetan nago
Zonbait pertsutan arranguratu eginen naiz urrunago
Zuzentasuna galtzen ari da orai gero ta geihago
Horra zergatik noiztenka nagon gaua baino ilunago.
2
Zonbat dirade ezin biziaz nigarretan dagozinak
Zonbat dirade beren herritik ihesi badoazinak
Zonbat dirade besteen bizkar bizi errexa dutenak
Zonbat dirade besteen bizkar bizi ta hilen direnak?
3
Gure Herriak seme alaba ainitz badu kartzeeltan
Hoien burraso dohakabeak bizi nigar ixiletan
Hobendun diren aintzindariak ohorezki igandetan
Ikus ditaizke sainduen gisan mezakari elizetan.
4
Gure lur huntan balinbadago denendako ontasunik
Zuzentasunez kanpo ez laike zinez aberastasunik
Erraiten bada: «Ezin da izan osoki zuzentasunik»
Alde jokatu behar ginuke baginu gizontasunik.
5
Zuzentasuna, azkatasuna, lurrean baitezpadako
Biak ditugu beharrezkoak Eskual-Herriarendako
Gudua luze izanen dugu bi hoien irabazteko.
Iraun dezagun Eskual-Herria betikotz pitz-arazteko.
6
Zerupetako lano ilunak aizeak ditu urratzen
Iguzkiaren argi zirriztek goibel artetik argitzen
Gure bizian entsaia gaiten ilunpetik argiratzen
Jaungoiko onak lagun gaitzala zuzentasuna obratzen.