Etchegaray Jaun Kardinaleari
F.P.
1
Bazkai ondoan pertsu batzuek kantatu nahi nituzke
Holako egun xoragarriak merezi ditu nik uste
Apez, auzapez, adixkideak, berdin zahar eta gazte
Kardinalea, zuri herrian agurtu nahi zaituzte.
2
Ohoratzerat etorri zaitzu gore jaun apezpikua
Diosesako buruzagla Krixtau oroz maitatua
Erdal herrian sortua gatik gu bezen Euskaldundua
Borondatea erakusten du, guretzat zer etsenplua!
3
Aita Battitta, euskaldun zintzo, erloi egile handia
Hark egin obrak toki askotan oraino ikusten dia
Bere bizian gizona eta girixtino ibilia
Krixtautasunik ederrenean altxatu du familia.
4
Bere herria maitatzen baita nunbait sortua delarik
Bainan Ahetze maite duzula ez dut egiten dudarik
Lehen ez balitz handik etorri Ezpeletarat amarik
Euskal-Herrian etzen entzunen gaur Kardinale famarik.
5
Bihotz bihotzaz goresten zaitut, jaun Kardinale berria
Burrasoentzat izana zira seme bat maitagarria
Gazte gaztetik, ikasle ona eta fededun garbia
Izpirituan sortu zitzaitzun Jaun Jainkoaren argia.
6
Mila bederatzi ehun eta hogoita bian sortua
Uztaritzen ta Baionan eta Erroman eskolatua
Hoita bortz urte bete orduko herrian ordinatua
Ordinatzaile zinuelarik Saint Pierre apezpikua.
7
Kardinaleak gradu handia, karga gehio oraino
Argitasunak ekarri zaitu gradu handi hortaraino
Euskaldunetan Kardinalerik ez dut entzun egundaino
Euskal-Herria altxatu duzu lurretikan zeruraino.
8
Bakantzeterat jitearekin goxatzen gintutzun ongi
Urrats ederrak ibiltzen ere zinituen mendiz, mendi
Basaburutik Mundarrain-dino eta ere Artzamendi
Iragaitean agur eginez Ainhoako Birjinari!
9
Musean ere aritzen zinen, jaun apezak kontrario
Elgarrekilan ziren ardura Beheran ta bikario
Jokorik gabe musean ere gezurrak guti balio
Greciet- akin galtzaile zinen gauze hoi dela medio.
10
Uztail hilaren lehena aurten zer orroitzeko eguna
Aita sainduak jaun Kardinale izendatu zaituena
Berrehun lagun baino gehiago Erroman zen Euskalduna
Ikusi gabe ezin erran da han sendi zen zoriona.
11
Zu Baionatik Pariseraino lehenik zinen airatu
Han Frsntziako apezpikuen sekretario onartu
Jaun Kardinale Marti-k zintuen apezpiku lagun hartu
Bai eta gero urtea gabe Marseillan artxapezpiku.
12
Ene agurra eskaintzen zaitut orai hemen azkenean
Bururapen bat izaten baita gauzarik hoberenean
Azken desira egiten dautzut euskaldunen izenean
Gure gidari izan zaitezen zerurateko bidean.