Oro badoatzi

Frantxoa

 1

 Hatxondoko zubipean ibaia kurri-kurri,

 Uhain bata darraikola ondoko uhainari.

 Gure bihotz feirosetan ur bizia iduri,

 Amodio bizienak iheska beti ari...

 Nihaur beha nagolarik mundu aldakorrari.

 2

 Iguzkia zeru-zolan gora eta behera,

 Inguratuz badabila goizetik arratsera.

 Nehun ezin arrestatuz argitzen dauku lurra;

 Bainan gaua uzten dauku. Bihotzetik gauze bera,

 Nihaur mundu ilaunari nagolarik begira.

 3

 Manta xuri baten pare hedaturik lurrean,

 Elur garbi distiranta zeinen eder neguan,

 Inguruko itsusia estaltzen duenean;

 Bainan laster urtzen zaiku primadera jitean,

 Nihaur urtze hoieri so nagolarik munduan.

 4

 Begiaren jostagarri, usain on ekarlea,

 Udarekin lilitua, zeinen airos lorea!

 Xuri, gorri, urdin, hori, bozten du eskualdea.

 Bainan ez du begiratzen luzaz bere florea,

 Nihaur trixte nagolarik eihartze horri beha.

 5

 Hots, aldizka munduari guziak badoazko

 Ezer ez badagonik aldi baten buruko.

 Ni ote naiz geldituren joaite horren lekuko?

 Ala eiki egun batez, guzien iduriko,

 Bere gisa lur hau utziz norapeit aldatuko?