Xalbador adixkide zenari
E.A.
1
Lau aste huntan euriek zuten itotzen hasia lurra
Ez ginakien noiz geldituko zen zeruaren nigar hura
Azaroaren zazpian zaiken denbora txarra burura
Iguzkiak'e bote zeraukun bere behako samurra
Zuri Xalbador hok ere nahiz eskaini bere agurra.
2
Urepeleko zeru gainean gore zitazken urtzoak
Haize ezti bat ekartzen zuen mendi artetik hegoak
Zer ote zuen izpirituan gure Xalbador gaixoak
Bozkarioa dudarik gabe gordea bihotz xokoak
Eguna zuten horri eskaintzen herriak eta Jainkoak.
3
Parerik ez du nehoiz izanen, Xalbador, zure biziak
Zure alderat zordun gelditzen dira euskaldun guziak
Horren ordaintzen igande hortan xumeki ginen hasiak
Bainan Jainkoak nahi zauzkitzun eman zeruko graziak
Hemen nigarrez utzi ondoan zazpi euskal probintziak.
4
Xalbador zure omenaldia nork ez du here gogoan
Egun handia izango zela ageri zen zure soan
Apostoluen artetik Krixto nola zerurat zen joan
Halaber zira zu ere sartu betiko bakezko loan
Euskal-herriko haur ta anaiak zintuelarik ondoan.
5
Zure lagunen bertsu ederrez orroitzen noiz arras ontsa
Denek zioten Jainko Jaunari egina beren otoitza
Senda zezala lehen bai lehen, Xalbador, zure bihotza
Bainan bertzela zeruak dautzu helarazi bere botza
Hango sainduak ta aingeruak zutaz zitazkela goza.
6
Ez ditut hemen nik aipatuko zure Ian miresgarriak
Zure liburu xoragarrian asko dira ezarriak
Nahiz oraino gelditzen giren gose eta egarriak
Akabo zure ezpainek zuzten bertsuak eta irriak
Dolutan daude Euskal-herriko mendi eta iturriak.
7
Urepeleko izar argia joan zauku beraz ihesi
Egia dela. onhartu behar, alta ezin da sinetsi
Begiak goiti altxatu eta otoitzean nintzan hasi
Ilargia zen bete betean, Xalbador ez du ahantzi
Hau nahi zuen here argian zeruraino helarazi.
8
Egun ederra egun txarrerat kanbiatu da bet-betan
Zure bihotza ezin zaiteken senda ahal ohoretan
Uztén daukuzu zer etsenplua odolaren mintzo hortan
Euskal-herria ahuspez dago, Xalbador, zure oinetan
Zure izena sartua baita Euskaldunen bihotzetan.
9
Egin ziloa ezin da estal, iduritzen zeraut eni
Euskal herritik hola joaitea nola ditake gomeni
Lehen erranak orai obretan zure «Jainkoa eta ni»
Bainan etxean direnak ere Jaunak ditzala konpreni
Kontsola bitza familia ta laguna zuen Léonie.
10
Betiereko bake ta pausu, Xalbador, dautzut opatzen
Zeruko alki ederrenean zirela ez dut dudatzen
Guziz zorretan izana gatik heu derautzut nik eskatzen
Euskal-herria hortikan ere lagunt dezazun salbatzen
Bai eta ere gure nigarren zure bihotzaz xukatzen.