Joan zauzkiguner
E.A.
1
Larunbatean, beti bezala, nere etxerat bainaiz jin
Auto aide bat, pausu betean, plaza gainean zagotzin
Agurtzean dut neure amari «hoiek zer dira» galdegin
Arrapostua «bi ehortzeta egun badituk Iholdin».
2
Bere biziko laguna zuen galdua zoin berrikitan
Gaixo Mari Point itzali zauku guzien ustegabetan
Jaunak ez zuen hau utzi nahi bakartasun trixte hortan
Senarra eta sainduekilan ezar beza zeruetan.
3
Berriki kantuz ari ginela gerlarien bazkarian
Mattin maitea gurekilan zen, oi zer omore onian,
Orroituko naiz irri batekin elgarren zirikatzian
Azken aldikotz ari ginela nago ezin sinetsian.
4
Iragan zaukun igande hortan bezperetan zu elizan
Errepikatuz beti bezala kantuz baitzira arizan
Kantu xume hau eskaintzen dautzut egun otoitz baten gisan
Zeruko xoko ederrenean gure Jainkoak har zitzan.
5
Denek bezala izan ditutzu zure itzal eta hutsak
Bainan ez ote du zonbait argi hedatu zure bihotzak
Bazinakien nola sendatu trixte zirenen ez-ontsak
Omore onez beteak ziren zure solas eta hitzak.
6
Itzali zira zoin laster noie arbola ganik hostua
Zure zerbaiten nik entzuteko banuke aldiz gostua
Bi adixkide zuretzat ziren bertsua eta kantua
Utzi daukuzun orroitzapena daike zer arrapostua.
7
Zuk erakutsi omore hori gogotik ez baitirot ken
Nigar askoren sort-iturria bilakatu zautzu azken
Jendalde orok zure irria hartuz beren erakaspen
Zer mundu airos xoragarrian denak bizi ginitazken.
8
Noiz sendatuko ote zerauku utzi duzun bihozmina?
Ezinbertzean eskaintzen dautzut gaur azken nigar samina
Oraidanik dut Jainko Jaunari fagore hau galdegina
Noizbait zeruan entzun dezadan, Mattin, zure irrintzina.