Bihotzetik zonbait pertsu
E.A. Iholdiarra
1
Arrossagaray lagun maitea zirelakotz urrun joana
Kantu hunekin nahi nikezu agertu nik ene pena
Zuri pentsatuz bizi naiz hola bai gaua eta eguna
Garazitikan airatuz geroz hor zen xori airosena
Ene pertsuko lagun bakarra hauxe dut nik bihotz-mina.
2
Oi Jainko ona zertako bada utzia nausu bakarrik
Nere bihotzak zuen menbro bat bet-betan hola kendurik
Eta zuri-re nere laguna hitz hau derautzut urrundik
Ausartzia bat hartu behar dut ezin egonez ixilik
Ez zena bada Eskual-Herrian zure doiako lekurik.
3
Su batek ere oi bere kea ondotik baitu igortzen
Halaber egun zure berriak trixtezian tut aditzen
Sasoinarentzat joanik ere oino paso izanen zen
Bainan egiaz edo gezurrez fama hori da kurritzen
Arrossagaray pertsularia Amiketat dela joaiten.
4
Hiru bat urte bazuen orai lagun nintzela zurekin
Ta zonbait pertsu badugu segur emanikan elgarrekin
Pertsu horiek hil-eta ere atxikiko tut neurekin
Zure ahotik solas ederrik aditu dut plazerrekin
Beraz nik egun zertan zirenetz nahi nikezu ba jakin.
5
Kasu ttipia eginen nuen ukan dutan dohainari
Ez bazina ba zu egun batez gertatu ene gidari
Konfiantxa ta maitasun bero eskainirikan elgarri
Pertsularitzak badiraukela bier zeraunkun iduri.
Joaiten bazira badut beldurra hori, galduko den sarri.
6
Gazterik ez da nihun sortzen ta xahar hoiek nahi utzi
Bakarrik uzten bunuzu hola laster dezakezut etsi
Denak holaxet abandonatuz Eskualdunak ta Garazi
Geroak zuen gider bakarra funts hortan ote da hautsi
Pertsuen oihu eztiari zuk nola duzu borta hetsi.
7
Orai artean Eskual pertsuak bazituen ainitz erro
Bainan horiek pusa dezaten behar da euri ta bero
Horiek biak etor ditezen horra zuretzat bi lerro
Nahi batuzu pertsuak entzun oraixe bezala gero
Ni laguntzeko hor nuzu bainan zure eskutan da oro.
8
Lagun on baten bihotz trixteak azken pertsu huntan dio
Hasi sailaren segitzeko-re heia ez zautzun balio
Sekulan eza entzun baneza ez nuke ez bozkario
Pertsua biek beira dezagun gostarik ere kario
Gaur ikus arte derautzut bainan ez dut errango adio.