Ene andre ona
E., P.-L.
1
Ene Andre charmanta, zu,
Gure haurren ama ona,
Familian, chahar gazte,
Orok maite zaituguna:
Iguzki bat iduri duzu,
Denak ontzen dituena!
Zuri esker dugu etchean
Daiten bizi urosena.
2
Chorittoak primaderan
Chichtu kantutan dabiltza,
Penatuak direneri
Emendatuz esperantza;
Guri berdin batzutan etchen
Heldu bada zorigaitza,
Ezti ezti kurai emaile
Da, Maitia, zure boza!
3
Ikus azu baratzean
Erlea nola dabilan
Umentzat du ezti ona
Hango fruta-lorekilan;
Hak bezala, gelditu gabe,
Egiten duzu ainitz lan:
Haurrek ez dute deus faltarik
Holako Amarekilan.
4
Familia heldu zauku
Gure bizitze gozoan:
Plazer dut zu ikustea
Hirugarrena altzoan;
Amodio azkar batekin
Biek hau dugu gogoan:
Ainitz anai arreba ttiki
Izan detzazten geroan.
5
Haur chumea ohakoan
Zoin den flako, zoin mendre
Zuk daizkotzu azkartuko
Bizia eta fedea;
Eri bada, berriz ere zuk
Eztituko dolorea;
Mirakuilu baten pare da
Zuk daukazun botherea!
6
Amattori oihuz dago,
Iratzar'orduko, haurra:
Musuņo bat nahi duke,
Nahi Amaren bulharra;
Bertze deusen acholik eztu,
Bainan zu nahiz nigarra;
Harendako mundu berri hau,
Zu zira bakar bakarra.
7
Haurrek zauzte ar arazten
Goizetik arats lanian;
Heien janaz artha hartuz
Nola garbitasunian;
Gaizkitik zaint, ona erakuts,
Atchik bide chuchenian...
Pagatuko othe zaituzte
Haundituko direnian?
8
Geroari fidatu naiz
Zu emaztetzat hartzean;
Ez dukegu pasatuko
Biharamuna gosean;
Guretako eta kampoko,
Denentzat bada eltzean;
Auzo, kusi, al'eskaleak
Laket dira gur'etchean.
9
Zeruko Jaun Jainkoari
Zer eskerrak zor dituztan!
Egun batez, hak emanik,
Zer emazte ona dutan!
Guretako balio duzu
Zure pizua urhetan,
Egun oroz emanen duzu
Zoriona mundu huntan.
|