Agur
Txori-txiki
Agur biotzez lagun laztana,
Ez nago zutzaz aztu ta,
Gazterik iges egin diguzu
Biziko aria moztu ta.
Erbeste ontan illarte iņork
Atsegiņikan ez du ta;
Illunan onduan alaitu zaite
Betiko biziz poztu ta.
Guraso maite, anai laztanak,
Joan da semea emendik;
Gazte bikaņak benetan maite
Ziņuzten biotz barrendik;
Ez negar egin, alkarnatuko
zerate berriz oraindik;
Besarkada bat emateko zai
Begiraka dago andik.
Gogo ta biotz aspaldi ontan
Jaungoikuari emanik,
Galdu aundirik ez du izandu
Mundu ontatik joanik;
Ez uste izan lurrai begira
Makurtu ta zegoanik
Usai gozoko lore bikaņa,
Zikin txarrik gabetanik.
Arpegi alai, irriparrezka,
Zure ondokuen poza,
Langille trebe, umil, zintzua,
Lagun artean bildotxa,
Goiz eta arrats kapil txurian
Sututzen zendun biotza;
Gure artetik ez da berela
Joango zure oroitza.
Bi urte luzez ibilli zera
Gure artean paketsu,
Agindu danak txintxo egiņaz
Gozoro eta maitetsu;
Guri negarra utzi ta pozez
Zerura aldegin dezu.
Biotz xamurrez begira ortik
Lagunik maite ba dezu.
Mundu ontako txoko danetan
Eriotzaren larria,
Bere aurrian daramazkila
Zar izan edo berria
Jainkuak mozten duen orduko
Guree egunen neurria.
Aldiz aurretik degu lekua
Kanpo santuan jarria.
Ez litzaiguke gaizki egongo
Geron barrura biltzia
Noizikan beinka azken orduan
Gogoratuz ibiltzia;
Gaur edo biar, ez jakin arren,
Gaņean degu iltzia.
Igesi baņo ez al da askoz
obe ondo bizitzia?
Gazte ta zarrak danok baguaz,
Gallen eriotz maltzura;
Nolabait ere bukatu bear
Emengo bizitz laburra:
Guraso onak artu biotzez
Gure naigabe agurra.
Jaso begiak, oroituz gure
Bizi leku ez da lurra.
Batzuk orain, besteak gero
Danak banaka deitzian
Maite gaituzten biotzak negar,
Aiek utzi ta, iltzian.
Danontzat aņa atsegin bada
Negarrik ez dan etxian.
Neke guztiak aztuko dira
Alkarrengana biltzian.