Salomon bigarrena
Izazpik
Aldizkari bat nere
eskutan erori,
denan ezaguna da
«Arantzazu» ori.
Gauza bildurgarriak
entzuna askori,
baina ainbestekorik
ez beintzat iñori.
Elizaren barnean
zenbat zalaparta,
ainbeste aldaketak
zalantza dakarta.
Dena zuzendutzeko
gizon bat bear ta,
orra, nun sortu zaigun
fraille bat aparta!
Salomon lenengoa
Jainkoen antzera,
bigarrena etzaio
gelditzen atzera.
Jainkoak bialdua
dona zuzentzera,
mundu ontako duda
guziak kentzera.
Otzaurteko seme bat
zenduan galdezka,
ainbeste dudarentzat
segurantzi eska.
a zuk golpetik kendu
orrenbeste kezka...!
Ori egingo duan
Salomonik ezta!!!
Elizaren dotriñak
ez dula zalantzik,
ta dogmak berriz iñoiz
ez dute mudantzik...
Au gogoratutzen dit
ainbat segurantzik,
ez diotala artzen
egiaren antzik.
Zalantza aundiakin
ainbeste jakintsu,
eta Eliza ere
daukagu berdintsu.
Baina zure ustetan
dira bi berritxu,
gizona nola jarrí
liteke ain itxu?
Gizon kapazak dira
dudak dauzkatenak,
ez dira teologo
txotxolo batenak.
Baina munduko juez
jarri zeratenak,
aguro kondenatu
zerbait dakitenak.
Zalantzan dagoena
biurtu nai egi,
jendea engañatzen
ez da errezegi.
Gaur ziur egotea
ez al da geiegi?
ala komeni zaigu
ta orrela segi.
Bear etzan gauz asko
len erabaki zan,
zuk jarraitu nai dezu
lenagoko gisan.
Naiz ta Jangoikoaren
argi asko izan,
amaika anka-sartze
egin da elizan!!!
Guzia dogma jartzen
izan gera trebe,
orrek ekarri digu
amaika naigabe.
Zu berriz egin zera
egiaren jabe,
gizon jakintsuen bat
dudarikan gabe.
Lurrez egindakoak
eleiz zuzendari,
utsegin deguanok
gera pekatari.
Eta zergatikan ez
aitortu danari?
Ez al diozu entzun
Aita Santuari?
Zeruan dadukagu
sarrera debalde,
saiatzen geradenok
Elizaren alde.
Bide segurutikan
zertarako alde?
Salba nai dezutenok
Salomoni galde!!!
|