Bakersfield-eko pilota plaza
Etchamendy, Mattin
1
Irrintzina bat entzun izan da egun Bakersfield aldetik
Amerikano euskaldun orok aditu dote engoitik
Nihaurek ere daukat bihotza alegrantziaz beterik
Gure amentsa bururatua ondikotzat ikusirik.
2
Pyrenetako mendi aldetan Euskal-Herri xoko hetan
Gure aitasok hautatu zuten pilota lengo mendetan
Joko garbi hau maitatua zen beti euskal haurridetan
Guk ere berdin segi dezagun zoinek gure lekuetan.
3
Euskaldun gazte pilotariak xuritan jauntzirik plazan,
Iduri dote larrazkeneko urtxoa pago aldaxkan
Begia argi, gogoa garbi, odola sano zainetan
Joko hoberik ez dut ikusi nihun ere mundu huntan
4
Kalifornian iguzkia da itsas aldean etzaten
Euskaldun asko egun dirare beren odolaz oroitzen
Ikusiz hola euskal usaiak Amerikan ohoratzen
Euskaldunaren nortasuna da asko bihotzetan pizten.
5
Azken pertsu hiretzat dohak, euskaldun aita maitea
Bizi haizeno beira zak beti euskaldunen bertutea
Euskaldunaren nortasuna duk ontasun paregabea
Hire semeaz egizak otoi ontasun horren jabea.