Emak hor Bahamontes

Errobi

 1

 Emak hor, Bahamontes,

 kaskoetako arrano gorri miresgarria!

 Hire izenean

 Ezin xuxenago ezarri ziteian

 «Montes»!

 «Montes» ala «mendi»,

 Hi bethi buruzagi heietan gaindi!

 2

 Bego ordoki zapala

 bai eta zelhai apala

 Anketil melixkarentzat.

 Besterik amesten diagu hiretzat.

 Patar xuta duk, peti goiti,

 hire adixkidek mina.

 Bide maldatsua, petik goiti,

 hire bihotzeko panpalina;

 Lot hakio aldapa malkarrari

 ahalik haindurkiena!

 Bi errotadun zaldi arina

 bi beharrietarik aztaparkatuz,

 bulta hadi, bulta, mendi-leporat buruz!

 3

 Ez duk zelan jartzeko ordua:

 laster odoletan lukek hire ipurdi-larrua.

 Ago xutik

 hire esproinen gainean.

 Orpekoak zapazkik

 aldizka,

 haguna ezpainean!

 Galka, galka, galka,

 mahatsa balitz bezala.

 Jakin-zak jaliko den arnoa

 bitoria izanen dela!

 4

 Bahamontes, dantza hadi, dantza,

 Bizikletan punpaka

 eta goiki behaka.

 Dantza hadi, dantza,

 ez baduk ere hortako,

 esperantzaz kanpo,

 lagun-musikarik...

 Soinu ederra duk jadanik

 esperantza!

 5

 Makur eskuin, makur ezker, 

 Begiz bide-intak iker. 

 Egik indar, egik oldar,

 (ez egin, haatik, andar!)

 Eta habil aintzina,

 gizona,

 hire laster ederrean!

 Patarra xutago,

 Dantza borthitzago!

 6

 Hala duk: goitirakoan,

 samindu zaik hozdura,

 bakandu zaik airea,

 hatsa berriz laburtu,

 beharriak tapatu,

 izerdia lapatu,

 egarria gordindu,

 ixta-zainak zurrundu,

 bihotza ikaratu,

 bai eta akidura

 gain-behera

 gorputzean kokatu...

 Bainan ez duk gelditu

 hire bethiko dantza,

 Oi Bahamontes gaitza!

 7

 Hersturen erditik gogoan hituen

 katedrale batek zarizkon ezkilen

 danga-etrepikak...

 Populu osoak goresten hintuen

 oihuka, txaloka, eta goraipatzen

 hire balentriak...

 Eta orhoitzapen hoieri esker,

 (makur eskuin, makur ezker)

 horra hi,

 bethi dantzari,

 goiti ari,

 eta, ametsa akulari,

 mendi-leporat lehen ethorri!