Asto bat Errelekiekin.

Zalduby.

 Asto bat kargatua

 Erreleki sainduz,

 Triki triki bazohan

 Pampalina soinuz.

 Jendea erreleki

 Hoieri inguruz,

 Zeinatuz pharatzen zen

 Ukhurturik buruz.

 Ohore hoi astoak

 Beretzat zagokan;

 Ez zuen egundaino

 Holakorik ukhan

 Jendeen agur hoiek

 Ikustearikan,

 Irrintzinaz hasten da

 Lorian, jauzikan.

 Norbeit ohartuz horren

 Atrebentziari,

 Oihuz hasi zitzaion:

 "Ai Zer astoa hi!

 "Ez gaituk ez agurka

 "Hiri buruz ari;

 "Bainan hik bizkarrean

 "Deramakanari."

 Zembat den bazterretan

 Asto horren pare!

 Zeren diren aberats

 Baitute ohore!...

 Aberatsak hartzekotz

 Ohorea bere,

 Behar luke diruaz

 Bertzerikan ere.