Artzain beltcharen neurthitzak. Alegiak (XXVII. Ohore laborantzari)

Zalduby

 1

 Munduan oi! zein eder den

 Ohorezko bizia,

 Guziz laborariaren

 Lanak irabazia!

 Hark du orai, nola lehen

 Hazten mundu guzia.

 2

 Laborantza gauza handi

 Eta botheretsua!

 Hartan da lanean ari

 Jainkoaren eskua,

 Gizonaren eskuari

 Berma dadin lotua.

 3

 Ez balitz laboraririk

 Hits lagozke bazterrak;

 Ez liro gauza handirik

 Eman nihor alferrak.

 Hiritarra, hik segurik

 Zer jan hezaken, errak.

 4

 Bizitzeko behar diren

 Gauza lehen lehenak,

 Bihi, fruitu, zer nahi den,

 Oilo, abre gizenak,

 Jendeak laborarien

 Eskutik ditu denak,

 5

 Orhoit gaiten artio hori,

 Aihenaren odola,

 Edaterat nork orori

 Ematen duen hola.

 Jakin gabe ez da sori

 Edatea nihola.

 6

 Laborari etchetan den

 Hauk haur eder lerroa!

 Zangar lodi, gorphutz lerden,

 Larru garbi sanoa;

 Aita ama leialen

 Ondorio gozoa.

 7

 Laboraria lanean

 Egunaz da nekhatzen;

 Bainan gero arratsean

 Familiaz gozatzen.

 Gabaz aise da ohean

 Goizeraino lokhartzen.

 8

 Igandez, Eskual-herrian,

 Eder laboraria!

 Elizan kantaz lorian;

 Plazan, pilotaria;

 Chahartu'ta, jar-harrian

 Juje'do chacharia.

 9

 Laborantzari ihesi

 Hambat seme alaba,

 Ai! ondikotz, baitoazi

 Toki arrotzetara;

 Alhorrak larre'ta sasi

 Hara han daiten bara.