Aspirinak ehun urte bete

Egaña, Andoni

 1

 Aspirinaren gainean egin

 nahi nuke gaurko saioa.

 Alemaniako Leverkusen-en

 orain ehun urte jaioa,

 zuria, txiki ta borobila;

 tramankulu arraioa,

 ondoezari aurka egiten

 benetan bitxo iaioa.

 2

 Hau da Lourdesko Amabirjiñan

 mirarien parekoa:

 arintzen digu tripakomina,

 lepo ta bizkarrekoa,

 belaun-junturen oinazea ta

 berdintsu kaskarrekoa.

 Horra bitxi bat merkea eta

 efekto azkarrekoa.

 3

 Horra farmako bikain bat gure

 minak kentzen dakiena,

 hainbat gazte ta hainbat zaharri

 mesede egin diena.

 Aspirina da minen aurkako

 burrukaririk finena;

 gerra bakar bat galdu izan du:

 aginetako minena.

 4

 Produkto txiki honen gainean

 hara jendeak zer dion:

 aspirinari esker badugu

 nahiko ditxa ta zorion.

 Etsai gogorrak irten zaizkio

 Nolotil ta Otalidon,

 baina halare aspirinaren

 parekorik ez da inon.

 5

 Gazte jendea berez ibiltzen

 da zirraren egarri ta

 deskuidoren bat izan ezkero

 zenbat zigor ta errita.

 Antisorgailu gisara ere

 hauxe inbentu polita,

 ezetz hutsegin emakumeen

 belaun.tartean jarrita.

 6

 Andre gajo bat bizi omen zen

 hamasei haurren esklabo.

 Mediku jaunak azaldu zion:

 aspirinekin, akabo.

 Ta galdetzean ea noiz hartu,

 aurrez edo geroago,

 erantzun zion: ordez hartuta

 arriskurikan ez dago.

 7

 Inoiz edo behin oker badabil

 gizasemeen makina,

 ez al zara zu bere akatsa

 ondo konpontzen dakina?

 Nahiz zu ez izan Rayos X-a

 edo ta penizilina,

 zure txikian maite zaitugu

 zorionak aspirina.