Ezkontzeko promesa
1
Orai zonbeit denbora pentsatu gaberik
Ikusi izan nuen lili bat charmantik:
Ene begiak ziren lilluraz betherik,
Ene bihotza ere hainitz trublaturik.
2
Lili frango pollitik sasoin guzietan
Errekontratu dizut bai orai artean:
Hek ikhustearekin ez nuen sekulan
Plazer bat hain eztirik nola zurekilan.
3
Primadera huntako gau ederño batez,
Ilargia zelarik, hedoirik baterez,
Deliberatu nuen partitzea oinez
Tristezia kentzeko harekin egonez.
4
Bidea nuen segur aiserik pasatu,
Amodiuak hegalak berekin baititu.
Zorionak ninduen han idurikatu,
Ene lili maitea leihoan kausitu.
5
Inposible lizaiket hemen erraitea,
Enetako zoinen zen amiragarria,
Behakoa zerura nola itzulia,
Zelarik arratseko othoitzian jarria!
6
Ez ninduen ikusten, gordea bainintzan,
Hurbildu bainintzaion hitz hauk erraitean:
«Ez zaitezela izi ene presentzian,
Hunat jin izan bainaiz desir onekilan!
7
O zu edertasunez zirena bethia,
Primaderako lili ororen printzia,
Barka diezadazu ene ausartzia,
Zure othoitz kartsua hola trublatzia.»
8
Ene ganat zituen begiak itzuli,
Erraiten zaudalarik boz ezti batekin:
«Ez nun ez trublatzen orai ni segurik,
Zu zintudan gogoan othoitzen artetik!
9
Ene bihotzak ez du, erranen dut klarki,
Zu ikhusiz geroztik trankilitaterik:
Zure orhoitzapenak nau segitzen bethi;
Gauza hori nerautzun zuri erran nahi.»
10
«Jainkoak nahi zuen duda gaberikan,
Sugar bera sor zadin gure bihotzetan:
Nik ere berehala maitatu zintudan,
Amodio fidelaz ez in dudarikan.»
11
Nik hura entzutean hain gochoki mintzo,
Aingeru baten boza zautan enetako.
Eskuak ginituen eman partitzeko,
Promes fidelekilan elgar izaiteko.