Espos Gaztieri kontseilu
1
Gizon aberats baten semeak aitari zion galdegin
Hogoi eta lau urte baditut bizi naizela zurekin
Atzo oneski solas egin dut dama gazteño batekin
Dote on batez ni laguntzia zindukeia zuk atzegin.
2
Aita on harek erraiten dio: «to bi miliun urretan»
Hoitaz bertzalde izanen dituk hiru miliun lurretan
Bainan gauza bat erraiten dauiat, semia, hire onetan
Dirua gatik gizonak gizon izan behar dik obretan.
3
Ontasunean igeri baitzen etxeko seme bakarra
Espos laguntzat hautatu zuen nexka gazte bat beharra
Bainan ondikotz ahantzi zuten aitaren erran zuhurra
Laster hixtu zen hekien zorte aberats eta ederra.
4
Urte bat gabe erraiten dio alabak here amari
Zertako ote behatu naiz ni aberatsaren famari
Urusa nahiz esposatu niz dirudun handi jaunari
Geroztik nigarra dut edari ta urrikia janari.
5
Amak! Zer uste dun dela haurra ezkontza hortan sartzea
Ala kaderan jarri eta han kantuz gitarra gotzea
Ez dakina hik arrosak ere baduela arrantzea
Estatu guzietan bakotxak badin here gurutzea.
6
Beren ait'amen kontseilu onez noizbeit zirenian orhoitu
Gogoeta onak zinez eginik Jainkoa zuten otoiztu
Harek zituen zorigaitzetik zorionerat gidatu
Bizitze uros berri batean orduan ziren finkatu.
7
Berentzat ala Jainkoarentzat xede onetan baitziren
Elgarrekilan bihotz fidelez gauza orotan bat ziren
Ezkondu eta ez zuten uste zirela luzaz biziren
Espos maiteak, aingeru eder, egun urtetan hil ziren.
8
Gertakai horrek emaiten dauku esenplu on bat guri hor
Jasaitekorik ez duenikan munduan ez baita nihor
Bat bertziaren zorigaitzetan izan gitetzen jasankor
Ongi eginen saristatzeko Jainkoa ez da ahanzkor.
