Artzain zakurra gogoan
D.E.
1
Bertsu berriak kantari nator artzain xakurra gogoan
Hau baiņo lagun umilagorik neretzat ez da munduan
Gure bizia daramakigu bat bestearen onduan
Xakur maitea, bertsu saio bat, aspaldi hartze zinduan.
2
Egun guziez jeiki orduko astean daukat xakurra
Ikusi ordu egiten daita bere gisako agurra
Eta nik ere eskaintzen diot neure karesa apurra
Goizetik arrats bera baitaukat laguntzaile bat segurra.
3
Beraren berdinikan ez dauka halako lagun airosak
Behin ere ez baitu lotsatu ez beroak edo hotzak
Errespetua sortarazten du haren erausien hotsak
Laister elkarretarazten ditu ardiak eta bildotsak.
4
Noizbait ardi bat baldinbadago xoko baterat juana
Konturatzen da ez duela ondo bukatua lana
Ezti eztia ekarriren du hura ere bertzen gana
Lan egin-eta ikus ditake lasai jarririk emana.
5
Xuri eta beltzezko jantzia bere izena du pintto
Iņolaz ere etzaiken izan orai den baino pollitto
Bere izena entzun orduko pozez egiten du salto
Ez dut pentsatzen ni berarekin izanen naizenik kito.
6
Eginbideak betatzen ditu ez da xakur herabea
Ongi badaki nor den nagusi nor duen bere jabea
Hizketan ez du ikasi bainan da ulertzaile trebea
Esan ditake pintto dagola artzain xakur bat noblea.
7
Nere juan etorri guziak ulertzen ditu jautzian
Izan dadin igandea edo merkaturat joaiten
Gizarakoa ikus ditake tristura ilun batean
Eta ezerez galdegin gabe geldituren da etxean.
8
Arditegiko ate xokoan Pintto egoten da triste
Era hortako egunak ere baditu bat edo beste
Asko maitasun dadukan batek badauka aunitz sineste
Eta bertze zoin kabala klasek agert dezake hoinbertze.
9
Ordu guziak pasako ditu nere ikusteko asmoz
Harentzat ere bakardadea oso illuna delakoz
Ni etxeratzen senditu ordu bide erditara datoz
Bozkarioa eskaintzen daita bere sainga eta saltoz.
10
Aldi bat ere ez det ikusi xakur hau asarretua
Eta lanerat manatu eta norapait eskapatua
Neri zerbitzu egin beharrez beti dago griņatua
Leialtasunez hornitua da halako errespetua.
11
Xakur guziek munduratzean badute beren dohaina
Ez da dudarik nere hau ere sortua zela artzaina
Urte askotan egon dadila orain den bezein bikaina
Hau galdu eta ez dakit nundik beldu nezaken ordaina.
12
Xakur maitea ezarri zaitut merezi zenduen faman
Ahal izanta gorago ere nahi zintuzket eraman
Nik zuretako ez nuke nahi douse gaixtorik hauteman
Maitasunetik nahi duenak nork berak behar du eman.
