Etsimendu
Duhalde
1
Mendiak bete hedoiez;
Oihan-errekak daude beltz.
Begiak altxatzen ditut: zeruetan izar bet ez...
Nihon ez duket gogorik, ilun bainago bihotzez.
2
Enetzat ez da egunik,
Nihoiz ere iguzkirik!
Ez hila, bainan halere hobian nago bizirik.
Ez, enetzat gehiago zeruak ez du argirik!
3
Habil, habilkit, bizia!
Urrunt hadi, gezurtia!
Atseginak agindu-ta, minez bete nauk guzia;
Habil! Utzak, utz, gorputz hau orotarik biluzia!
4
Lore guziak arrantze,
Uki guziak oinhaze
Ni naiz ama-ganik sortu jasaiteko hunenbertze?
Ez da enetzat izanen ez ganbio, ez eztitze...
5
Atsulai mendi gainean,
Iguzki eder denean,
Kapera bat ageri da bi harri beltzen artean:
Elurra ez zen hein xuri, gan den negu bihotzean!
6
Boz bat etorri zait handik,
Gabaz lo nindagolarik:
Entzun ez dut behin ere hein kantu xarmangarririk,
Ene bihotza pilpiraz gelditu da zoraturik.
7
- Nor da niri mintzo dena?
Eztiki deitzen nauena?
8
- Ni naiz minen gozatzaile, Arrantze-gaineko Ama
Oi, haur inkoniatua, laster egizu ni gana.
9
- Zeru goratik lurrera,
Arrantze baten gainera,
Gure Ama guziz ona, bihotz ezti, bihotz bera,
Zu zare jautsi zarena gizonen kontsolatzera.
10
Hemen naiz zure oinetan,
Dena nigar-uharretan.
Ama ona, har nezazu, otoi, urrikalmendutan,
Gaixtaginen asperrari gorde zure besoetan.