P. Lafitte... aintzindari
Diharce, Jean Marie (Xabier Diharce, Iratzeder)
1
Mutiko nihun ezin egonak
gerokoen sukarren ihainak
han harat eremanak,
baginoatzin Lafit-ekin, Lafit aintzindari,
pottoka talde bat iduri,
Uztaritzeko iratzetan jauzika,
haren erranen hegaletan ameska...
Eta bet-betan hara jauzten zela,
bozkariozko ihurzuri,
haren tanpezko irri-karkaila.
2
Kentzen zauzkigun harek herabeak
urratzen harek ilunbeak;
eta geroztik, zoin gure alde
munduan baigabiltza bidez bide,
ekaitz egunetan
izitzeko ala etsitzeko
ihurzuri-karrasketan,
hara gogorat jauzten zaikula
irrintzina bezein pizgarriko
haren irri-karkaila.
3
Bizi huntako
itsumendu, etsimendu guzieri
oldartu eta nausitu ondoko
irri-karkail hori
kirri-karra zaio idatz-luman ari.
4
Burua hotz, begia zorrotz
gauez gau badabila
dena fede, dena bihotz
nundik ilunbeak zila,
nundik nola gezurrak aurki
eta nota ken osoki.
5
Sekulan ezin dio
Euskarari ere jasan
gezurrezko deus misterio;
eta, kaskoin errorik ez duten,
ari da euskal-hitzetan
bila-bilatzen.
6
Herriko ala kanpoko
dela jende, dela politika,
nihor ez dauka, deusik ez dauka
Jainkoaz bertzerik, Jainko.
Horiek hola,
lurreko gauzik ederrenak
maiz agertzen zaizko
azal hutseko
gaztainak
bezala.
7
Denak huts agertzean,
zer egin ?
Otoitzean
egon ezin-ikusiari begira,
entzunez fedearen beharriekin
hutsaren hutsaz barnagoko
Jainkoaren bihotz-pilpira...
Eta gero,
mundu zabaleko
handikerien azal hutsak oro
trufatzeko,
guzien pizgarri
airez aire igorri
etsimendu guziez goragoko
irri-karkaila.
8
Bere luma zorrotzaz egin du
Lafit-ek lan eta gudu,
bere solasez, bere urratsez
euskaldungoa du zabaldu.
9
Orai badago
euskal-biltzarretan
bere solasez, bere urratsez
euskaldungoa du zabaldu.
10
Orai badago
euskal-biltzarretan
gero-ta ixilago,
bertzeak daudelarik eztabadan,
kataskan eta kalapitan.
11
Bai, basa-mortu lurrak
loratzen dituzten ibaiak bezala,
trabak, mugak, herrak
orroaz gainditzen edo kraskatzen dituzten
ŕtsas-uhainak bezala,
zenduen hezurrak
piztu detzazken
Jainkoaren Hatsa bezala,
doala, bakar bezein azkar doala,
denak bozkarioz ihurzurikatzeko,
denak euskal-amodioz elgar besarkarazteko,
Lafit-en betiko
irri-karkaila.