Nun habil orai...?
Iratzeder
Nun habil orai, Etchahun, zoin bidetan kantuz,
Hire pertsuno minakorrak jender karkailatuz?
Hire bihotz kartsu eta zabalegi hori
Bidetan othe deramal, zarrapo ta zauri?
Herrentsa othe haiz bethi beilaz beila joaki,
Ezpain zimurrak irri barnea urriki?
Ez othe ditek geihago, ontsa bazkaldurik,
Kikera-zolan kausitzen hire trufa tcharrik?
Etchahun
Izen bero, izane ilhun...
Etchahun
Chiberotarrak hastean jauzi errabian
Ez othe haiz hor kantari dantzaren erdian?
Elizen hiru dorreak ari direnetan,
Eskualdun zintzurren bortchaz, kantu daldaretan,
Ez othe haiz hor, Etchahun, bozek airatua,
Zerurat eskaintzen ari eskualdun kantua?
Ez othe hor, aize luzek, gau-intzirak lagun,
Gauez-gau diotelarik: Etchahun, Etchahun...?
Hor ere, Etchahun baten deiadar berea.
Pizten delarik kantatuz! «Agur, Ziberoa!»
Etchahun
Izen bero, izen ilhun
Etchahun
Hi bezain pertsularirik ez duk orai nihun...
Begia ortzi ta chimichi jeiki ba, Etchahun.
Badituk bai, noiz edo noiz chutitzen direnak
Eta arno sukarrean pertsutan dauzinak.
Bainan hik bertze sukarrik, bertze surik huen:
Minez, maitez, errabiaz hintzen hi pertsutzen!
Ni, nolazpeti inharresak eskual-lur hoztua!
Haugi nola gau-itzala, nola hil zeinua...
Etchahun
Izen bero, izen ilhun...
Etchahun
Entzun beza nork edo nork, hire deia entzun,
Eta gora egin bezo pertsuka oiharzun.
Eskual-minak eta suak hezurretan jana,
Jalgi bedi oihutzeko bihotzen auhena.
Hezur ta larru, dohala kantuz eta eske,
Munduko bidetan bilduz jenden trufa merke.
Bai, dohala bidez-bide eta beilaz-beila,
Eskual-anaien amorez Jainkoaren bila...