Nere kotxe txarrari
Danbor-enborra
1
Gure etxean bada
kotxe berezia,
orain dela sei urte
neuk erosia.
Ikusgarriak dira
bere ahulezia,
zitalkeria eta
jenio bizia.
Morroi itsusia,
non duk malezia?,
bertsotan hasia
daukak nagusia
Erabaki beharra
zegok auzia.
2
Hirekin izan diat
hamaika oztopo,
hartu ere bai zenbait
belarrondoko.
Zergatik egin ote
genian guk topo,
geroztik ibiltzeko
beti mokoz moko?
Hau hartzeko pronto,
emateko tonto,
lanari gorroto,
aldapetan poto...
Baina ez dit gehiago
adarrik joko.
3
Joan zaio gaztetako
fanfarroikeria,
hain barrukoa zuen
harrokeria.
Heldu zitzaionetik
daukan miseria,
belarri makur dabil
Lure azeria.
Atzo huskeria,
bihar bateria,
noiznahi aberia,
hau da loteria!
Ajez beteta daukat
kotxe eria.
4
Berritan bizkor eta
gero ttapa-ttapa,
igo du zenbait malda
eta aldapa.
Orain dena herdoitua
barren eta txapa,
indar gehienak ere
aidean eskapa.
Gaztetan bai txanpa,
gu zeinek harrapa,
gaur, berriz, axanpa,
aje eta karranpa.
Arrazoi du kartelak:
«Ven en tren, papá».
5
Barruan ba omen ditu
zazpiren bat zaldi,
antza denez pipiak
joak sei t'erdi.
Hasieran ematen
nuen Fitipaldi,
gaur Domingo Kanpaña
makaldiz makaldi.
Hamaika izerdi.
aterata geldi,
gero nola segi
ematen aurpegi?
Jubilatua behar
zuen aspaldi.
6
Gasolina-ontzitik
makina bat trago
nere kotxe txarrari
emana nago.
Lehen tenientea zen,
orain, berriz, kabo,
laster soldadu hutsa,
azkenik akabo,
ajeen esklabo
egina baitago,
lur jota zeharo,
gero eta okerrago.
Erretiroa hartzeko
hobea dago.
7
Erruz kostatzen zaio
bidean joatea,
ez du oso urruti
errematea.
Arrastaka darabil
tupo eskapea,
olio Bariola
beti errapea,
nonahi derrapea,
puzkarra eta kea,
dardarka atea,
berdin bolantea.
Liter etxetik bota
eta bakea!
8
Zaharra etxetik bota,
berria erosi...
baina ez dut miloirik
inon ikusi.
Gaurko bizimodua
hain dago itsusi,
zorra haunditan sartzeak
bai al du merezi?
Dirua ihesi,
soldata ezin hazi.
Aizu, Joxpinixi,
aje eta guzi,
lehengoa konpontzea
hobe dut kasi.
9
Zaindu beharrean naiz
etxeko morroia,
erdipurdi dabilen
seat morroia.
Hasteko kontuz kendu
azpiko herdoia,
gero txukun pintatu
barren eta goia.
Baina armazoia,
betiko kartoia.
Xenpelar bazkoia,
non duzu bastoia
Zuzpertzerik ba al dago
gure betroia?
10
Edozeini edozer
barkatzeko aina
izan duk beti nire
bihotz bikaina.
Oraingoz salbo dituk
azpi eta gaina,
berritua kanpoa,
barrua apaina.
Kakin ezak baina
Domingo Kanpaña
dela, alajaiña,
hire kapitaina.
Itxuraz ibil hadi
kotxe liraina.
|