Dote trixtea (Kantu xahar)

 1

 Aitak senartzat eman daut

 mutiko bat gaztea.

 Bainan mutiko gaixoak

 ni banau emaztea,

 Jakizue zoin trixtea

 ukan dudan dotea.

 2

 Sukaldeko ukana dut

 zartain bat funditua;

 Harekilan gatilu bat

 beharriz gabetua;

 Eta arka bat zaharra

 dena harrek hartua.

 3

 Behi eri bat gainera,

 diti motz bakarduna;

 Eta astaña mehar bat

 mainguka dabilana.

 Hori da kabaleria

 aitak eman dautana.

 4

 Ausko pare bat bertzalde,

 baitakarke hats guti;

 Eta ganibet lanputs bat

 erdoildua biziki;

 Orroitzapen hoitaz nahiz

 ene bihotza hunki.

 5

 Amak aitaren ixilik

 eman daizt bi mihise,

 Biak bipiek hasiak

 ]aster baitziren ase.

 Hain ziraden usainduak,

 bota baititut aise.

 6

 Amak present egin zautan

 ezkontzeko mantarra,

 Berak luzaz ekarria,

 hertsi eta laburra.

 Laster piltzar eginen den

 orai badut beldurra.

 7

 Amak berriz eman zautan

 zuhurtziaz makila

 Inkas hasarre balekit

 ene Jakes umila.

 Bainan Jakes orai arte

 perestuki dabila.

 8

 Beharrik ene gizonak

 dote ametsik gabe

 Hartu ninduen beretzat

 ninduelakotz maite.

 Bertzenaz egin zukeien

 arras merkatu trixte!