Heletako kermeza

Camoussarry, J.-P.

 1

 Agur eta ohore gure herriari,

 Bai eta Heletako jende guziari.

 Kermezaz zonbeit pertsu ditu egin nahi,

 Aurthengoak aipamen merezi du naski.

 2

 Uztailaren zazpia, oi egun ederra!

 Iguzkia distiran plazaren erdira...

 Bazterrak apainduak guzien gostura...

 Ikusliarrak ehunka choraturik beira!

 3

 Laburzki derautzuet aipaturen goiza:

 Egunaren hasteko denek entzun meza.

 Eta mahain sainduan gazte-keta gaitza

 Nola ez Jaungoikoak Heleta geriza?

 4

 Hainitzek badakite zer daiken janiza.

 Ez du nehork eginen Heletan poliza:

 Zerri-zango, kafe on, eskualdun paztiza,

 Ez da bekatu handi egun gormandiza!

 5

 Atsaldean jendea bildu da trumilka,

 Denek nahiz ikusi pilota-partida,

 Baziren jostatzeko asko joko mota:

 Fandango, soka-tira, zoin gehiagoka.

 6

 Gero zer afaria plazaren erdian!

 Hiru ehun lagunez goiti mahainean...

 Mattin eta Chalbador gostu ederrean...

 Bihotzak sutan eta zirtoa mihian!

 7

 Zonbat kantu emanik eskualdun airetan,

 Banazka edo berdin bi, hiru bozetan.

 Omore ona nausi denen bihotzetan:

 Ez da eskuara galtzen gure herrietan.

 8

 Afal ondoan haste zer jantza-jauziak!

 Zahar bai eta gazte, berdin emazteak,

 Bihotza hunkitzen du hortchet ikusteak

 Familian bildurik herritar guziak!

 9

 Gomendatzen diozkat Ama Birjinari

 Heletako jendeak, handi ala ttipi,

 Bestak joan dakizkigun arras eskualdunki

 Izan dadin Heleta Eskuara-ithurri!

 10

 Agur beraz orori, lagun, adichkide!

 Izan zaitezte bethi ohiduren aide.

 Jainkoak nahi badu daugin urte arte

 Anartean guziak ongi bizi zaizte.