Amets-herria
Camoussarry, J.-P.
1
- Atzar hadi, atzar hadi, ene seme Premundo!
Hi, hintzen hire amaren bozkario bakarra.
Zertako bada heldu zaik lo-artetik nigarra?
Atzar hadi! Hire aitak bagiraturik hago.
2
- Zer herri da loak eman dautan amets-herria?
Dena zelai eta mendi berde bezain loretsu
Han ama ikusten nuen, eder eta amultsu,
Xoriek zariotela agur xoragarria!
3
- Xuriz bezti bildotsekin hara-huna zabilan,
Eskutik ninderamala irria ezpainetan...
Ene loria harekin; orai aldiz penetan!
Noiz bada aurkituko naiz berriz amarekilan?
4
- Haur maitea, gau guzia, ibili nuk ni ere
Amets-herri erdian den ur-handiari hurbil:
Bainan ura ezin pasa, zoriona ezin bil!
Hemen gaituk, ene haurra, lurra-galduen pare!
5
- Orduan, aita, orduan, hemen zer ari gira?
Bai, zer ari, beldurrezko leku etsitu huntan?
Amets-herria guretzat hobea da miletan,
Goiz-albako izar xuri dirdiratik han-hara.