Xakur karlina
1
Xakur arrotz karliņa bat
Ethorri zaiku herrirat,
Ahakinen ikusterat,
Hen ondarren garbitzerat:
Goiz huntan jin zait atherat,
Xingar-tripot usnatzerat.
2
Buztana du bihurria,
Bizkarra gorri-gorria,
Muthurra luze-jalgia,
Sabela mehar, hertsia:
Iduri du axeria,
Enganatzen ikasia.
3
Jadanik ezagutuak
Dauzka hemen ostatuak;
Haragi beltz ustelduak,
Hezur zahar usainduak,
Behi-tripa kinotsuak,
Iresten ditu potxuak.
4
Sagua bezain abila,
Xakur herresta xirtxila
Zokoz-zoko badabila
Janari zikinen bila:
Ni banintz hiri-mutila,
Hauts nezoke mustipila!
5
Ixilka, gau ilhunetan
Sartzen da gure barnetan
Oihal, zilhar botigetan,
Kontseiluko biltzarretan,
Nexka gazte bilkuretan,
Musika den tokietan.
6
Nihork ez dio balaka,
Sobera baita kilika;
Laster hasten da xanpaka,
Mutikoer ausikika:
Haurrek, beldurrez, kalika
Pasatzen dute karrika.
7
Asko dira sinhetsirik
Debruak dela harturik,
Satan dugula jautsirik,
Xakur-larrua jauntzirik
Andre guziak lazturik
Etxean daude geldirik.
8
Nolaz da hunat erori
Xakur karlin maltzur hori?
Nik erranen dut orori
Ez nizela fida horri:
Beharko dugu igorri
Hemendikan buztan gorri!
9
Entzun dudanaz, Parisen
Xakurrak tuzte trahatzen;
Poliziaren laguntzen
Han dute bertan ikasten
Gure potxua Bordelen
Nik uste gisan liteken.
|