Bozen denbora
B.D.
1
Ene seme gaztea entzun-ak hau ongi
Eta beha-zak otoi ene erraneri
Ez baitukek oraino ikasirik aski
Nik errana behar duk gogoan atxiki
Aintzinekoen hutsak ez ditzagun berri
2
Bozetaz duk mundua egun arrangura
Asaldatuak asko, hanitzak minbera
Zoin izanen ote den herriko jaun mera
Nor altxatu behar dut ohore-mailera?
Hoi segurik aurdiki, gibel-aldez gora!
3
Herriaren origin denek mihi-puntan
Besterik baduteia bihotz-gogoetan?
Gizonik hoberena, bozka-egunetan
Otso bilakatzen duk, ororen kaltetan
Ondo onik ez baitu geroko urtetan.
4
Ohoretan zirade, zu, "demokrazia",
Lehen, jendetze batek ixuri hazia
Boz-denboretakoa, hitz bat berezia
Eta hek iragan-ta laster ahantzia
Hor ez baita ageri fartzuntzikeria?
5
Eskuaraz dugun erran: gizon izaitea
Ikasak hori zer den hik ene semea
Horren eskasa diuk kalte-egilea
Biziki eder zaukuk bestek agertzea
Dugun lehenik guhauk erakuts bidea.
6
Gizon izaitearen erakus-bidea
Ez zikindu neholaz besten ohorea
Utzok kontrakoari gogoan berea
Ez balinbazauk ere errex onhartzea
Harek ziok ez dela hire hoi hobea.
7
Azken abisu huni kasu bat handia
Eman beharduk otoi, hot baita mamia
Herra ken bihotzetik eta jelosia
Ez dutea eginik aski desmasia?
Har horien meneko deus ez duk bizia.
8
Herrian bada ere gorri eta xuri
Afruntu, ez kalterik, ez egin nehori
Bozak iragan-eta: keinu bat elgarri
Gostuan egiteko solas ta afari
Alde orotakoek, gizon izan sari.