XX-garren mendeko bihotz-kanta
Borda, Itxaro
1
Ez dizut maite erranen egun zeru sakonen urdina
Nik zeru ordez miresten baitut eskuek lantu burdina
Ez dizut maite erranen egun xorien kanta berdina
Nik beharritan entzuten baitut nekearen hots gordina...
2
Eta maitea, bertsolariak beste mendetan bezala
Aitortu behar hitzegiteko bertsoa hartu dutala
Hemerezortzi zangoko honek betiko atxik nezala
Ez baitezaket luzara gorde, maite maite zaitudala!
3
Nere buruak Arrazoina du gorputzari erakusten
Baina bihotza suaz ari da Adimenezkoaz husten
Malte maitea nere begiek zaituztelarik ikusten
Ikertzen duten mundu zoroa zuretako dute uzten...
4
Badaukat orain basamortua trebeskatzeko indarra
Hetsirik dauden bide galduak irekitzeko pindarra
Mila artino kondatzen ahal dut kendurikan aharra
Haren lekuan ezarri eta, maitasun amets zaharra...
5
Eta joatean azken basoa, gaueko azken agurra
Nehoiz uste ez den Denboraren iraupenaren apurra
Eta joaten ate-harrian, besarkadaren laburra
Esku artean irriz badoan negar guzien lapurra...
6
Eta burua altxatzean hor dauden norbaiten begiak
Argitu aintzin erraten diren historio, alegiak
Goiz lanotsuak direlakoan gure zoriontegiak
Denak beldurrez ditugu noizbait ikusten heldu egiak!
7
Ezagutzen dut gure Herria; baldin baduzu gogoa
Erakutsiko dizut emeki honen bihotza osoa
Udaberritan mendi apalen orlegitasun zoroa
Eta ondotik, Larrazkenetan haizhegoaren gozoa...
8
Lurrak gizonak, berak sorturik, ditu zuzenki bereak
Joaten dira haren haztera lore eta abereak
Nun ez garen gu noizbait berezten-etsipenaren beleak
Zure hezurren gainean nahi nituzke erre nereak.