Xalbador zenari
Borda, Itxaro
1
Hemeretzi ehun ta hirutan hogoi t'hamasei garrena
Azaroaren zazpian zaikun zendu Xalbador laguna
Bihotz, guziaz nigar egin dut, trixtea zen larrazkena
Euskal-herrian bertsolaritan Xalbador zen hoberena.
2
Gure herriko zeruak ziren haizearekin goibeldu
Gernikan zazpi hosto arbolan emeki dira zimeldu
Zeruko Jaunak zerbitzaria bere ondorat du bildu
Urepelen gaur aingeruekin Xalbador baita ixildu...
3
Auhen kantuaz bihozminaren oral kantatzerat nator
Hitza're zutan errege zagon; ziren olerkari gogor
Euskal-herrian ez zinuen ez zuk lotsatzen iñoiz nihor
Bertsu umil hauk zuretzat ditut moldatuak gaur Xalbador.
4
Fernando Aire Urepeleko Xalbadorrenean sortie
Bertsutan hasi zen gazte gazte gerlaz geroz hobetia
Laket zituen artzain etxeak, bai ederra zen mendia.
Ez dut bekatu oral ertea «Xalbador ene maitia!»
5
Urepeleko mendi xokotan betea nuen amentsa
Omenaldia oso eder zen bertsuez hein aberatsa
Nola besta zen bururatuko nehork ez zezaken pentsa.
Bainan urtxoak gau apalean eman zuen azken hatsa.
6
Hainbertze aldiz, Mattin, harekin zu ibilia zarena
Liberti zadin zuek biekin denétan bai euskalduna
Ta «Odolaren Mintzoa»-n duzu uzten zur'erakaspena
Mundu guzirat haize hegoak hedatu du zur'omena!
7
Xalbadorrentzat egin dezagun zazpiek bat ortzadarra
Xuri gorri ta urdin ta berde erakutsiz gur'oldarra
Zure boza're izanki eder mundu huntan zen azkarra
Euskaldunaren auhena zen ba, ta Fededunaren karra.
8
Zure bertsua Jainkoarentzat iturri egon dadila;
Hemen gabiltza aska-bideen. Euskadirendako bila
Zure itxura gogoetan ez da, EZ, sekulan ez hila
Ekia zira guretzat: beti argi ta bero gaitzala.
