Tximino beltza eta Kattalin gorri...

Borda, Itxaro

 1

 Bazen aspaldi tximino beltz bat Baionako ferietan,

 Beldurrik gabe bazabilana zubigain agerietan;

 Tximino harek ikusi zuen, euskal bitxikerietan,

 Kattalin gorri hein gorritxu bat, alba ahul erietan...

 2

 Kattalin gorrik: «agur tximino, ba ote duk hik denbora?

 Larretan hara, joan gaitezen, bide nabarretan gora,

 Gurekin hartuz behi urdina ta gure gatu angora,

 Biak bakarrik, han entzuteko nola edertzen den lora!»

 3

 Tximino beltzak, Aturri ibai ubelari mintzo zela:

 Kattalin gorri, iduri luken ura uhainer so dela,

 Alta itsaso sakoneraino, gazitasunen lo gela,

 Gal ezinezko ohidurekin doan emeki horrela!»

 4

 Kattalin gorrik, ordu berean, tximino beltzaren hatsa

 Senditu zuen, eta segidan, gaixo gure mikelatsa!

 Abiatu zen haren ondotik aurkitu, nahiz arratsa,

 Elkarrekilan jateko nonbait aihen beteko mahatsa!

 5

 Aihen beteko mahats molkoak kiretsak ziren oraindik,

 Urtarrilako hotz izozduna iragan baitzen hor gaindik.

 Kattalin gorrik: «tximino maite, mahats basa honek handik

 Oparotasun emanen diguk, maiatza loretan zain dik...»

 6

 «Maiatz beroa etor dadila gerezien xamurtzeko,

 Uhane ibai hegiko horma azken batzuren urtzeko,

 Maiatz beroak erre gaitzaia beldurraren beldurtzeko,

 Erre gaitzaia, ikara harek, uda mina agurtzeko...»

 7

 «Dator gaua, doa ura, nagoha lur arrotzean,

 Gure-bihotzaz behar ote naiz orroitu ipar hotzean»

 Zion tximino beltzak tristeki hutsaren hatsa botzean,

 Kattalin gorri gorritxu hari, bere sakua lotzean...